थप समाचार आइतबार, असार १४, २०७७

पुरानो शंख चोरिएपछि भक्तजनलाई छाब्दी मन्दिर प्रवेशमा रोक

रासस

पुरानो शंख चोरिएपछि भक्तजनलाई छाब्दी मन्दिर प्रवेशमा रोक
तस्वीरः दूरबिन नेपाल

तनहूँको धार्मिक पर्यटकीयस्थल छाब्दी बाराही मन्दिरमा रहेको पुरानो शंख चोरी भएपछि भक्तजनलाई मन्दिरमा प्रवेश गर्न रोक लगाइएको छ ।

सदरमुकाम दमौलीबाट करीब आठ किमि पूर्वतर्फ पर्ने छाब्दी मन्दिरमा शुक्रबार राति शंख चोरी भएको हो । त्यसपछि छाब्दी सुधार समितिको शनिबार बसेको आकस्मिक बैठकले भक्तजनलाई मन्दिर प्रवेश गर्न रोक लगाउने निर्णय गरेको छ ।

समितिद्वारा अर्को सूचना जारी नहुँदासम्म मन्दिरमा भक्तजन प्रवेशमा रोक लगाइएको समितिका अध्यक्ष हिमबहादुर रानाभाटले जानकारी दिए । छाब्दी क्षेत्रमा रातको १० बजेदेखि बिहानको ५ बजेसम्म हिँडडुल गर्न पनि रोक लगाइएको छ ।

मन्दिरको दुई वटा च्यानलगेटको चाबी फोडेर उक्त शंख चोरी भएको बताइएको छ । शंख चोरी गर्ने व्यक्तिको खोजी भैरहेको जिल्ला प्रहरी कार्यालयले जनाएको छ ।

केही दिनदेखि छाब्दीमा चोरी घटना बढ्दै गएपछि स्थानीयवासी चिन्तित भएका छन् । कुखुरा, बाख्रा, खसी, बोका र एक मोटरसाइकल चोरी भएको अध्यक्ष रानाभाटले बताए ।

चोरीका घटना रोक्न स्थानीय युवालाई रातको समयमा गस्ती गर्ने व्यवस्था मिलाइएको व्यास–१४ का वडाध्यक्ष काजीराम श्रेष्ठले बताए । तोकिएको समयअवधिमा अनावश्यक हिँडडुल गरेमा कानूनअनुसार कारवाही गरिने निर्णय भएको उनले जानकारी दिए ।

प्रतिकृया दिनुहोस