समाचार शनिबार, असार ६, २०७७

दक्षिण एसियाका तीन देशमा कोरोनाभाइरस संक्रमितको संख्या एक लाखभन्दा बढी

हिमालखबर

दक्षिण एसियाका तीन देशमा कोरोनाभाइरस संक्रमितको संख्या एक लाखभन्दा बढी

दक्षिण एसियाका देश पनि कोरोनाभाइरस संक्रमणको सूचीमा माथिल्लो स्थानमा पुगेका छन् । भारत र पाकिस्तानपछि बंगलादेशमा संक्रमितको संख्या एक लाख नाघेको छ ।

बंगलादेशमा अहिलेसम्म एक लाख पाँच हजार ५३५ संक्रमित फेला परेका छन् । त्यहाँ ४२ हजार ९४५ जना निको भएका छन् भने एक हजार ३८८ जनाको मृत्यु भएको छ ।

विश्वमा बढी संक्रमित भेटिएका देशको सूचीमा बंगलादेश १७औँ स्थानमा छ । अहिलेसम्म १८ वटा देशमा संक्रमितको संख्या एक लाख नाघेको छ । १८औँ स्थानमा क्यानडा छ ।

पछिल्लो तीन दिनमा बंगलादेशमा करीब १२ हजार संक्रमित फेला परेका छन् । दक्षिण एसियाकै बढी जनघनत्व भएको यो देशमा दैनिक मृत्युदर ४० को हाराहारीमा छ । गत बुधबार अहिलेसम्मकै सबैभन्दा बढी ५३ जनाको मृत्यु भएको छ ।

दक्षिण एसियाको अर्को देश पाकिस्तानमा संक्रमितको संख्या एक लाख ६५ हजारभन्दा बढी पुगिसकेका छन् । बढी संक्रमित भएका देशको सूचीमा पाकिस्तान १४औँ नम्बरमा छ ।

पाकिस्तानमा अहिलेसम्म ६१ हजार ३८३ जना निको भएका छन् भने तीन हजार २२९ जनाको मृत्यु भएको छ । पछिल्लो तीन दिन यहाँ नयाँ संक्रमित भेटिने दर घट्दो अवस्थामा छ । दैनिक संक्रमित हुनेको संख्या औषत साढे पाँच हजारभन्दा बढी छ ।

दक्षिण एसियामा सबैभन्दा बढी संक्रमित भारतमा छन् । अहिलेसम्म तीन लाख ९५ हजार ८१२ जना संक्रमित भेटिइसकेका छन् । बढी संक्रमित भेटिने देशमध्ये भारत चौँथो स्थानमा छ । अहिलेसम्म दुई लाख १४ हजार २०६ जना निको भएका छन् भने करीब १३ हजार जनाको मृत्यु भएको छ ।

यी तीन देशपछि दक्षिण एसियामा बढी संक्रमित नेपालमा छन् । नेपाल विश्वमा भने सूचीको ६९औँ स्थानमा छ । नेपालमा अहिलेसम्म आठ हजार २७४ संक्रमित फेला परेका छन् । तीमध्ये एक हजार ४०२ निको भएका छन् भने २२ जनाको मृत्यु भएको छ।

नेपालपछि सूचीमा माल्दिभ्स छ । त्यहाँ दुई हजार १५० जना कूल संक्रमित भेटिएका छन् । तीमध्ये १७६९ जना निको भएका छन् । माल्दिभ्स ९९औँ स्थानमा छ ।

श्रीलंका सूचीको १०३औँ स्थानमा छ । त्यहाँ एक हजार ९५० जना संक्रमित छन् । तीमध्ये एक हजार ४४६ जना निको भइसकेका छन् भने ११ जनाको मृत्यु भएको छ । ६७ जना संक्रमित भेटिएको भुटान विश्वमा १८३औँ नम्बरमा छ ।

प्रतिकृया दिनुहोस