समाचार बुधबार, जेठ २८, २०७७

दक्षिण एसियामा कोरोनाभाइरसः पाकिस्तानमा पनि एक लाखभन्दा बढी संक्रमित, नेपाल चौथो बढी प्रभावित

हिमालखबर

दक्षिण एसियामा कोरोनाभाइरसः पाकिस्तानमा पनि एक लाखभन्दा बढी संक्रमित, नेपाल चौथो बढी प्रभावित

कोरोनाभाइरसबाट संक्रमित हुनेको कूल संख्या पाकिस्तानमा पनि एक लाख नाघेको छ । विश्वमा एक लाखभन्दा बढी संक्रमित हुनेको देश १६ वटा पुगेका छन् ।

पाकिस्तानमा अहिलेसम्म एक लाख आठ हजार ११७ जना संक्रमित भेटिएका छन् । जसमध्ये ३५ हजार १८ जना निको भएका छन् भने दुई हजार ११७ जनाको मृत्यु भएको छ ।

पछिल्लो साता पाकिस्तानमा दैनिक पाँच हजारको नजिक संक्रमित भेटिएका छन् । मंगलबार चार हजार ७२८ संक्रमित भेटिए । अघिल्लो दिन सोमबार चार हजार ९६० संक्रमित भेटिएका थिए । यो संख्या एकै दिन भेटिएका अहिलेसम्मकै ठूलो हो।

उता भारतमा अहिलेसम्म दुई लाख ७६ हजार १४६ संक्रमित छन् । भारतमा निको हुने दर पनि उच्च छ । अहिलेसम्म एक लाख ३४ हजार ६७० निको भएका छन् भने सात हजार ७५० जनाको मृत्यु भएको छ।

बंगलादेशमा कूल संक्रमितको संख्या ७१ हजार ६७५ पुगेको छ । त्यहाँ १५ हजार ३७० जना निको भएका छन् भने ९७५ जनाको मृत्यु भएको छ । पछिल्लो २४ घन्टामा त्यहाँ ४५ जनाको मृत्यु भएको छ ।

भारत, पाकिस्तान र बंगलादेशपछि नेपालमा बढी संक्रमित भेटिएका छन् । नेपालमा अहिलेसम्म चार हजार ८६ जना संक्रमित भेटिएका छन् । ५८४ जना निको भएका छन् भने १५ जनाको मृत्यु भएको छ ।

माल्दिभ्समा एक हजार ९४२ कूल संक्रमितमध्ये एक हजार १० जना निको भएका छन् । त्यहाँ आठ जनाको मृत्यु भएको छ ।

श्रीलंकामा एक हजार ८५९ संक्रमित भेटिएका छन् । एक हजार ५६ जना निको भएका छन् भने ११ जनाको मृत्यु भएको छ । श्रीलंकामा संक्रमण नियन्त्रण हुँदै गएको छ । दैनिक संक्रमण दर ओरालो लागेको छ ।

भुटानमा अहिलेसम्म जम्मा ५९ संक्रमित भेटिएका छन् । त्यहाँ कसैको मृत्यु भएको छैन । १७ जना निको भइसकेका छन्।

प्रतिकृया दिनुहोस