परराष्ट्रमन्त्री प्रदीप ज्ञवालीले सीमा समस्या समाधानका लागि पटकपटक वार्तामा बस्न आग्रह गर्दा पनि भारत तयार नहुनुलाई आश्चर्यजनक भएको प्रतिक्रिया दिएका छन्।
मंगलबार प्रतिनिधिसभाको बैठकमा विनियोजन विधेयक २०७७ अन्तर्गत सम्बन्धित मन्त्रालयसँग सम्बन्धित बजेटका विषयमा सांसदले उठाएका प्रश्नको जवाफ दिँदै मन्त्री ज्ञवालीले अतिक्रमित भूमिको विवाद सुल्झाउन भारतलाई वार्तामा राख्न निरन्तर ताकेता गरिरहेको जानकारी दिँदै भारतले नचाहिरहेको जानकारी गराए।
"वार्ताका लागि निरन्तर ताकेता गरिरहेका छौं। वार्ता बाहेकको अर्को विकल्प छैन। हामीले सुगौली सन्धिबाट कायम भएको भूमि दाबी गरेका छौं" उनले भने "लद्दाखमा भारत धकेलाधकेल पन्छाएर वार्तामा बस्ने तर नेपालको हकमा भने वार्तामा बस्न नचाहनुले हामीलाई पनि आश्चर्यमा पारेको छ।"
मन्त्री ज्ञवालीले गत २ नोभेम्बरमा सार्वजनिक गरेको नक्शा भारतले स्वीकार गरे पुग्ने उल्लेख गर्दै नेपालले अतिरिक्त आकांक्षा नखोजेको बताए । "छिटो गरौं भन्ने ताकेता गरिरहेका छौं, हामीले अतिरिक्त भौगोलिक आकांक्षा खोजेका छैनौं," उनले भने।
सांसदहरूले प्रश्न राख्ने क्रममा बोलेका कतिपय शब्दमा ख्याल गर्न आग्रह गर्दै मन्त्री ज्ञवालीले नक्शा बारे टिप्पणी गर्दा आफ्नै मर्यादा बिर्सन नहुने सुझाव सांसदहरूलाई दिए।
मन्त्री ज्ञवालीले कांग्रेस सांसद प्रदीप गिरिले नक्शा सार्वजनिकलाई ‘नक्शा अस्त्र’ भनी प्रयोग गरेको शब्दमा समेत आपत्ति जनाए । उनले अस्त्रको मतलब लडाइँका लागि प्रयोग हुने हतियार हुने भन्दै नेपालले त्यस्तो कुनै अस्त्र प्रयोग गर्नुपर्ने अवस्थाको पक्षमा नरहेको व्याख्या गरे।