एक वर्षभित्र १३ सय मेगावाट विद्युत राष्ट्रिय प्रसारण लाइनमा थपिने
ऊर्जा, जलस्रोत तथा सिंचाइ मन्त्री वर्षमान पुनले आगामी आर्थिक वर्षमा १ हजार ३ सय मेगावाट थप विद्युत् राष्ट्रिय प्रसारण लाइनमा थपिने बताएका छन्।
मंगलबार प्रतिनिधिसभाको मंगलबारको बैठकमा विनियोजन विधेयक २०७७ अन्तर्गत ऊर्जा जलस्रोत तथा सिंचाइ मन्त्रालयसँग सम्बन्धित बजेटका विषयमा सांसदले उठाएका प्रश्नको जवाफ दिँदै मन्त्री पुनले आगामी वर्ष १ हजार ३ सय मेगावाट विद्युत राष्ट्रिय प्रशारण लाइनमा जोडिने बताएका हुन्।
आगामी आर्थिक वर्षको भदौ महीनासम्ममा माथिल्लो तामाकोशीको निर्माण सम्पन्न हुने भन्दै मन्त्री पुनले आगामी आर्थिक वर्ष भित्रमा ४ सय ५६ मेगावाट क्षमताको माथिल्लो तामाकोशी जलविद्युत आयोजनाका साथै निर्माणाधीन रसुवागढी, माथिल्लो सान्जेन, मध्य भोटेकोशी, निजी लगानीबाट प्रवर्द्धित अन्य आयोजनाबाट सम्पन्न भई करीब १३ सय मेगावाट थप विद्युत राष्ट्रिय प्रसारण लाइनमा थपिने दाबी गरे।
"जलविद्युत आयोजनाहरूको निर्माणका क्रममा नेपालमा उत्पादन नहुने विभिन्न निर्माण सामग्री तथा विद्युतीय उपकरणहरुमा मूल्य अभिवृद्धिकर छुट तथा एक प्रतिशत भन्सार लाग्दै आएको," उनले भने "यी निर्माण सामग्रीहरूको छुट दिने सूचीमा विभिन्न समयमा सामान्य परिवर्तन गर्ने क्रममा पेनस्टक पाइपलाई यथावतै राखी स्टिल पातामा केही भन्सार थप भएतापनि आगामी दिनमा यसको आवश्यक संशोधन गर्दै लगिने छ।"
उनले राष्ट्रिय गौरवका सिक्टा, रानीजमरा, कुलरिया, भेरी बबई डाइभर्सन र बबई सिंचाइ आयोजनाको निर्माण कार्यलाई छिटो सम्पन्न गर्ने कार्यलाई तीव्रता दिइने बताए । महाकाली सिंचाइ आयोजनालाई राष्ट्रिय गौरवको आयोजनाको रुपमा अगाडि बढाइएको जानकारी दिँदै पहाडी तथा हिमाली क्षेत्रमा सबै कृषि योग्य ठाउँहरूमा सौर्य ऊर्जाको प्रयोग गरी लिफ्ट सिंचाइ योजना कार्यान्वयन गर्दै जाने र आगामी आर्थिक वर्ष भित्रमा करीब ५ सय हेक्टर क्षेत्रमा कार्यक्रम सम्पन्न गर्ने समेत जानकारी गराए।
साथै जलविद्युत आयोजनाहरूको निर्माणका लागि प्रयोग हुने केही सामग्रीको भन्सार दर बढाइएको भन्ने प्रश्नमा मन्त्री पुनले आगामी दिनमा संशोधन गरी अगाडि जान सकिने बताए ।"जलविद्युत आयोजनाको निर्माणका क्रममा नेपालमा उत्पादन नहुने विभन्न निर्माण सामग्री तथा विद्युतीय उपकरणमा मूल्य अभिवृद्धिकर छुट तथा एक प्रतिशत भन्सार लाग्दै आएको छ," उनले भने "यी निर्माण सामग्रीको छुट दिने सूचीमा विभिन्न समयमा सामान्य परिवर्तन गर्ने क्रममा पेनस्टक पाइपलाई यथावतै राखी स्टिल पातामा केही भन्सार थप भए तापनि आगामी दिनमा यसको आवश्यक संशोधन गर्दै लगिने छ।"