समाचार शुक्रबार, जेठ २३, २०७७

विश्वमा उपचाररत कोरोनाभाइरस संक्रमितभन्दा निको हुनेको संख्या धेरै

हिमालखबर

विश्वमा उपचाररत कोरोनाभाइरस संक्रमितभन्दा निको हुनेको संख्या धेरै
null

विश्वमा अहिलेसम्म कोरोनाभाइरसबाट संक्रमितको संख्या करीब ६६ लाख ९८ हजार पुगिसकेको छ । तीमध्ये उपचाररतभन्दा निको भएका संक्रमितको संख्या धेरै छ ।

अहिलेसम्म ३२ लाख ४४ हजार ४२३ कोरोनाभाइरस संक्रमित निको भइसकेका छन् । ३० लाख ६० हजार २१३ जना भने अहिले पनि उपचारकै क्रममा छन् । जसमध्ये दुई प्रतिशत अर्थात ५५ हजार ४६० जना गम्भीर छन् ।

कोरोनाभाइरसबाट विश्वमा अहिलेसम्म तीन लाख ९३ हजार १२७ जनाको मृत्यु भएको छ । कोरोनाभाइरसबाट सबैभन्दा बढी प्रभावित हुने देश अमेरिका हो । त्यहाँ अहिलेसम्म एक लाख १० हजार १७३ जनाको मृत्यु भइसकेको छ ।

अमेरिकामा सबैभन्दा बढी संक्रमित छन् । त्यहाँ संक्रमितको संख्या १९ लाख २४ हजारभन्दा धेरै पुगिसकेको छ ।

एक लाखभन्दा बढी संक्रमित हुने देशको संख्या १४ पुगिसकेको छ । पछिल्लोपटक मेक्सिकोमा संक्रमितको संख्या एक लाख नाघेको छ । अमेरिका, ब्राजिल, रुस, स्पेन, बेलायत, इटाली, भारत, जर्मनी, पेरु, टर्की, इरान, चिली र मेक्सिकोमा एक लाखभन्दा बढी संक्रमित छन् ।

यीमध्ये स्पेन, फ्रान्स, इटाली, जर्मनी र बेलायतमा संक्रमण नियन्त्रणको क्रममा छ । एसियाका दुई देश भारत र इरानमा मात्र एक लाखभन्दा बढी संक्रमित छन् ।

भारतमा संक्रमितको संख्या दुई लाख २६ हजार ७१३ पुगिसकेको छ । धेरै संक्रमित हुने देशमध्ये भारत सातौँ स्थानमा छ ।

यसबाहेक क्यानडा र साउदी अरबमा संक्रमितको संख्या ९० हजार नाघिसकेको छ । दक्षिण एसियाली देश पाकिस्तानमा ८५ हजार २६४ र बंगलादेशमा ५७ हजार ५६३ संक्रमित छन् ।

प्रतिकृया दिनुहोस