समाचार आइतबार, जेठ १८, २०७७

चौपाया राख्ने पाटनमा प्लास्टिकको पाल हालेर क्वारेन्टिन

हिमालखबर

चौपाया राख्ने पाटनमा प्लास्टिकको पाल हालेर क्वारेन्टिन

मुगु जिल्लाको पश्चिमी भाग खत्याड गाँउपालिकाले भारतबाट आएका नागरिकलाई तरकारी फलाउने प्लास्टिकको पालमा क्वारेन्टिन बनाएर पशु चौपाया राख्ने पाटन क्षेत्रमा राखेको छ ।

त्यहाँ बनाइएका अव्यवस्थित तवरले निर्माण गरिएका क्वारेन्टिनमा स्थानियहरू कोचाकोच गरेर बस्न बाध्य भएका छन् । भारत तथा अन्य मुलुकबाट आएका स्थानीयलाई क्वारेन्टिनमा राख्नका लागि १० स्थानमा पालहरू बनाइएका छन् ।

सोही गाँउपालिका—५ हलेखाडा र छोटेमा स्थापना गरिएको क्वारेन्टिन बर्षा याममा भेडा बाख्रा राख्ने पाटन क्षेत्रमा पर्दछन् । आफूलाई भेडा बाख्राजस्तै गरि राखिएको क्वारेन्टिनमा बसेकाहरूको गुनासो छ ।

हलेखाडा र छोटेका क्वारेन्टिनमा तरकारी खेतिका लागि प्रयोग गरिने प्लास्टिकले निमार्ण गरिएका पालमुनी स्थानियलाई बसालिएको छ । जस्मध्य हलेखाडामा ४८ र छोटेमा १ सय १९ जनालाई राखिएको छ । एउटा पालमुनि २० देखि २५ जना भारतबाट फर्केकाहरू छन् ।

दुधे बालबालिका समेत रहेका ती क्वोन्टिनमा आगो ताप्नका लागी जङ्गलबाट दाउरा समेत ल्याउन नदिएको उनीहरूको गुनासो छ । चिसो भूइमाथि सुत्नु पर्दा कोरोनाको संक्रमण भन्दा चिसोले ज्यान जाने खतरा देखिएको छ । हेल्प डेक्सको समेत ब्यवस्था गरिएको छैन ।

क्वारेन्टिाइनमा राखिएकाहरूको अहिलेसम्म ज्वरो समेत नापिएको छैन । आरडीटी र पीसीआर परिक्षण समेत कहिले हुने हो भन्ने पनि अहिलेसम्म एकिन छैन । सौचालय र खानेपानीको झन समस्या छ ।

भारतबाट फर्किएर क्वारेन्टिनमा बसेका खत्याड गाँउपालिका ३ का रविन बानियाँले सरसफाईका सामग्री पनि उपल्बध नभएको बताए । “बिहान बेलुका एक छाक भात खान पाइएको छ । पशु चौपाया त गोठमा राखिन्छ, पाटन क्षेत्रको चिसो खुल्ला आकासमा पलास्टिकको पालमुनी हामीलाई राखिएको छ” बानियाँले भने “पशु चौपाया भन्दा तल्लोस्तरको ब्यवहार गरेर पाटनमा राखिएको छ ।” उनले खानेपालीको सबै भन्दा ठूलो समस्या रहेको बताए ।

क्वारेन्टिन ब्यवस्थापनको जिम्मा पाएका युवाहरूलाई समेत मास्क, सेनिटाईजरलगाएत स्वास्थ्य सामग्री नहुँदा जोखिम मोलेर काम गर्नु परेको हलेखाडा ब्यवस्थापन समितिका संयोजक कल बहादुर रोकायाले बताए ।

भारतबाट आउनेहरूका लागी झुगला, हलेखाडा, छोटेमा क्वारेन्टिनको ब्यवस्था गरिएको छ । कोरोना महामारी रोकथाम तथा नियन्त्रणका लागि बनाइएको क्वारेन्टिन सञ्चालन तथा व्यवस्थापन निर्देशिका २०७६ अनुसार न्यूनतम सरसफाईका सामगी्र, शौचालय, खानेपानी, सामाजिक दूरी कायम गरि सुत्न बस्ने व्यवस्था, खाना, नास्तासहित मनोरन्जन र शारिरिक व्यायम गर्ने व्यवस्था हुनुपर्ने भनिएको छ ।

खत्याड गाँउपालिका५ हलेखाडा र छोटे लेकमा स्थापना गरिएका पलास्टिक पालमा राखिएका भारतबाट आएका खत्याडबासिहरू ।


शब्द/तस्वीरः अच्युत राज भण्डारी, मुगु

 

प्रतिकृया दिनुहोस