थप समाचार शनिबार, जेठ १७, २०७७

प्रत्यक्ष प्रसारण गरिरहेका सिएनएन पत्रकारलाई अमेरिकी प्रहरीले पक्रियो

हिमालखबर

प्रत्यक्ष प्रसारण गरिरहेका  सिएनएन पत्रकारलाई अमेरिकी प्रहरीले पक्रियो

अमेरिकी काला नागरिकको हत्याविरोधी प्रदर्शनको प्रत्यक्ष प्रसारण गरिरहेका सीएनएन पत्रकार ओमर जिमेनेजलाई अमेरिकाको प्रहरीले मिनेसोटाबाट पक्राउ गरेको छ । बीबीसी, सीएनएन लगायत दर्जनौँ टेलिभिजनबाट प्रत्यक्ष प्रसारण भइरहेको स्थानबाटै उनी पक्राउ परेका हुन् ।

गैरहतियारधारी काला नागरिक पक्राउका क्रममा घाँटी थिच्दा मृत्यु भएपछि विरोधमा मिनेसोटामा प्रदर्शन भइरहेको छ । उक्त प्रदर्शनको प्रत्यक्ष प्रसारण गरिरहेका जिमेनेजसहित उनको क्यामरा टोलीलाई नै मिनेसोटाको प्रहरीले पक्राउ गरेको हो ।

प्रत्यक्ष प्रसारण गरिरहँदा उनलाई गरी हथकडी लगाएर लगिएको दृश्य सीएनएन, बीबीसी लगायत सञ्चारमाध्यममा प्रत्यक्ष देखाइएको थियो । उनको टोलीलाई पक्राउ गरेपछि भुईंमा राखिएको क्यामरा अरु चार मिनेट चालू भइरहेको भिडियोमा देखिन्छ । क्यामरा बन्द नभइ भिडियो समाप्त हुन्छ ।

पक्राउ पर्दापर्दै उनले गिरफ्तार गर्नुको कारण सोधेका थिए । तर, प्रहरीले स्पष्ट कारण नखुलाइ पक्राउ गरेको हो ।

त्यहाँ प्रदर्शनकारीलाई नियन्त्रणमा लिन दर्जनौँ प्रहरी खटाइएका थिए । प्रत्यक्ष प्रसारणका क्रममा जिमेनेजलाई अचानक ६ जना प्रहरीले घेरा हाल्छन् । त्यसपछि दायाँबायाँ दुई प्रहरीले पाखुरा समात्छन् । उनी त्यसको केहीबेर माइकमा बोलिरहन्छन् । तर, हथकडी लगाउन हात पछाडि लगिएपछि उनको क्यामरा भुईंमा खस्छ ।

उनी सञ्चारकर्मीलाई छुट्याइएको ठाउँबाटै प्रत्यक्ष प्रसारण गरिरहेका थिए । उनलाई किन पक्राउ गरियो भन्ने नखुलेको अन्य पत्रकारले जनाएका छन् ।

मिनेसोटाको प्रहरीले उनीहरु मिडियाकर्मी भएको खुल्नेबित्तिकै रिहा गर्ने बताएका छन् । उता गभर्नर वाल्जले यो घटनाको आफूले जिम्मेवारी लिने बताएका छन् ।

गएका मंगलबार जर्ज फ्लोएड नामका काला नागरिकलाई प्रहरीले गिरफ्तार गर्ने क्रममा लडाएर घुँडाले घाँटी थिचेको भिडियो सार्वजनिक भएको थियो । त्यसक्रममा उनले आफूले श्वास फेर्न नसक्ने बताएका थिए । पछि उनको मृत्यु भएको घोषणा गरिएको थियो ।

सन् २०१४ मा पनि प्रदर्शनमा उत्रिएका काला नागरिक एरिक गर्नरको घाँटी समाएका थिए । उनले पनि ‘म श्वास फेर्न सक्दिन’ भनेका थिए । उनको मृत्युपछि ‘आइ क्यान नट ब्रेथ’ आन्दोलन चलेको थियो । अमेरिकामा काला जातिमाथि भेदभाव र दमन हुने गरेको उनीहरुको आरोप छ । प्रहरीले पक्राउ गरेका पत्रकार पनि काला नागरिक हुन् ।

 

प्रतिकृया दिनुहोस