कोरोनाबाट प्रभावित नरैनापुरलाई निषेधित क्षेत्र घोषणा, सेना परिचालन गरिने
कोरोनाभाइरसको संक्रमणबाट प्रभावित बाँके जिल्लाको नरैनापुर गाउँपालिकालाई निषेधित क्षेत्र घोषणा गरी सेना परिचालन गरिने भएको छ ।
आइतबार बसेको बाँके जिल्ला सुरक्षा समितिको बैठकले नरैनापुरको स्थितिलाई नियन्त्रणमा राख्नका लागि उक्त गाउँपालिकामा निषेधित क्षेत्र घोषणा गरी सेना परिचालन गर्ने निर्णय गरेको हो ।
आज रातिदेखि उक्त गाउँपलिकालाई निषेधित क्षेत्र घोषणा गरी सेनासहित सुरक्षाकर्मी परिचालन गर्ने निर्णय जिल्ला सुरक्षा समितिको बैठकले गरेको हो ।
उक्त गाउँपालिकामा अहिलेसम्म १ सय १४ जना संक्रमित छन् । संक्रमितलाई अस्पताल लैजान नदिने र हुलहुज्जत गर्ने काम भएपछि शनिबार गाउँपालिकाले केन्द्र सरकारलाई गुहारेको थियो।