समाचार शनिबार, जेठ १०, २०७७

नेकपाको सचिवालयमा एमसीसीबारे छलफल

हिमालखबर

नेकपाको सचिवालयमा एमसीसीबारे छलफल

सत्तारुढ नेपाल कम्युनिष्ट पार्टी (नेकपा) को सचिवालय सदस्यहरुले अमेरिकन परियोजना मिलिनियम च्यालेन्ज कर्पोरेसन (एमसीसी) बारे छलफल गरेका छन् । बालुवाटारमा शनिबार अपरान्ह एमसीसीबारे छलफल गरिएको हो।

गएको पुसमा सम्पन्न केन्द्रीय कमिटी बैठकले एमसीसीबारे अध्ययन गर्न बनाएको कार्यदलले पेश गरेको प्रतिवेदनमाथि छलफल भएको बताइएको छ ।

एमसीसीबारे भएको छलफलमा कार्यदल सदस्यहरु भीम रावल र प्रदीपकुमार ज्ञवाली, स्थायी कमिटी सदस्यहरु देव गुरुङ र लिलामणि पोखरेललाई पनि बोलाइएको थियो ।

एमसीसीबारे कार्यदलले बुझाएको प्रतिवेदनको अन्तर्वस्तुबारे छलफल भएपनि कुनै निष्कर्षमा भने नेताहरु पुग्न नसकेको बैठकले स्रोतले जनाएको छ । कार्य दलका संयोजक एवम् सचिवालय सदस्य झलनाथ खनाल र कार्यदल सदस्य भीम रावलले संसदमा पुगेको एमसीसी संशोधन सहित पारित गर्नुपर्ने प्रतिवेदन पेश गरेका छन् भने कार्य दल सदस्य प्रदीप ज्ञवालीले छुट्टै प्रस्ताव पेश गरेका छन् ।

अध्यक्ष एवम् प्रधानमन्त्री केपी शर्मा ओली छलफलमा सहभागी थिएनन् । सचिवालयका सदस्यहरु बीच अनौपचारिक छलफल मात्रै भएकाले प्रधानमन्त्री ओली सहभागी नभएको बताइएको छ । नेकपामा एमसीसी पारित गर्नेबारे मत विभाजित छ ।

प्रतिकृया दिनुहोस