थप समाचार बुधबार, चैत १९, २०७६

सयौं किलोमिटर पैदलयात्रा गर्दै श्रमिकहरू घरतिर

हिमालखबर

सयौं किलोमिटर पैदलयात्रा गर्दै श्रमिकहरू घरतिर

देशमा बन्दाबन्दी गरिएपछि समस्यामा परेका श्रमिकहरु सयौं किलोमिटर हिंड्दै आफ्नो घरतिर फर्किरहेका छन् ।

काम गर्ने ठाउँमा बसिरहन कठिन भएपछि सास्ती सहँदै श्रमिकहरु घर फर्किरहेका छन् ।

बाराको आदर्श कोतवालका चन्द्र बैठा, सुरज पटेलसहित सातजना श्रमिक काठमाडौंबाट तीन दिन हिंडेर रौतहट आइपुगेका छन् ।

उनीहरु गरुडा र कटहरिया हुँदै बुधबार अबेरसम्म घर पुग्न सकिने आशा मनमा लिएर चर्को घाममा हिँडिरहेका छन् ।

काठमाडौंमा सानोतिनो काम गरेर जीविका गर्दै आएका उनीहरुलाई काठमाडौंमा बस्न मुस्किल भएपछि एउटा ट्रकमा बर्दीबाससम्म आएपछि त्यहाँबाट पैदलै हिंडेर घरतर्फ लागेका हुन् ।

रौतहटको ईशनाथ नगरपालिका ७ का हरिन्द्र साह कानु, महमद थारु, शेख जुमनसहितको पाँचजनाको समूह पनि काठमाडौंबाट हिंडेको चार दिन भइसक्यो ।

काठमाडौंमा श्रम गर्ने सातैजनालाई काम दिने ठेकेदार काम बन्द गरी हिंडेपछि अलपत्र भएर बस्न नसक्दा पैदलै घरतिर हिँडेका हुन् ।

चार दिनको पैदलयात्रा पछि बुधबार अबेरसम्म भए पनि घर पुग्ने आशा सबैमा रहेको छ ।

रौतहटकै फतुवा विजयपुरका चारजना श्रमिकहरु पनि विराटनगरबाट पैदलै आइपुगेका छन् चौथो दिन । विराटनगरमा उनीहरुले काम गर्ने उद्योग बन्द भएपछि एउटा कोठाको डेरामा बसिरहन मुस्किल भएकाले उनीहरु घरतिर लागेका हुन् ।

विराटनगरबाट पैदलै घरतिर हिँडेका उनीहरु पहिलो दिन विराटनगरबाट इटहरीसम्म आउँदा त्यहाँ एउटा तरकारी बोक्ने गाडीले कोशी पुलसम्म पुर्‍याइदिएको थियो । कोशी पुलबाट पैदलै हिंडेर तीन दिनमा चन्द्रपुर आइपुगेका चारैजनालाई बुधबार साँझसम्म घर पुग्न सकिने विश्वास छ ।

काठमाडौं, पोखरा, विराटनगर लगायतका शहरमा दैनिक ज्यालादारी गर्ने श्रमिकहरुको काम ठप्प भएपछि जोखिम मोलेर उनीहरु हरेक दिन फर्किरहेका छन् ।

बाटोमा जहाँ पायो त्यहीँ रात बिताउने तथा जे पायो त्यही खाँदै श्रमिकहरुले कहालीलाग्दो यात्रा गरिरहेका छन् । कठिन यात्रा गर्दा बाटोमा डर लाग्ने र कसैलाई कुनै सहयोगको लागि भन्न झन् डराउनु पर्ने अवस्था रहेको फतुवा विजयपुरका एक श्रमिकले नाम उल्लेख नगरी दिन आग्रह गर्दै बताएका छन् ।

भाडाको एउटै कोठामा चार–पाँच जनासम्म दिन र रातभर कोच्चिएर बस्न नसक्ने अवस्था भएपछि श्रमिकहरु पलायन भएका हुन् ।

सञ्जय मित्र, रौतहट

प्रतिकृया दिनुहोस