समाचार बुधबार, चैत १९, २०७६

बन्दाबन्दी लागू भएयता मात्रै १२ वटा अन्तर्राष्ट्रिय चार्टर उडान

राजु बास्कोटा

बन्दाबन्दी लागू भएयता मात्रै  १२ वटा अन्तर्राष्ट्रिय चार्टर उडान

सरकारले ११ चैतदेखि मुलुकमा बन्दाबन्दी (लकडाउन) घोषणा गरेयता नेपाल आउन र बाहिरिने अन्तर्राष्ट्रिय उडानका निम्ति १२ वटा विमान कम्पनीले चार्टर उडानको अनुमति लिएका छन् ।

बन्दाबन्दीपछि तीन विदेशी वायुसेवा र एक राष्ट्रिय ध्वाजावाहके उडान अनुमति लिएको नेपाल नागरिक उड्डयन प्राधिकरणले जानकारी दिएको छ ।

प्राधिकरणका अनुसार बन्दाबन्दी भएपछि कतार एयरवेजले ६ वटा, नेपाल वायुसेवा निगमले चारवटा, कोरियन र इत्तिहाद एयरले १-१ वटा उडान अनुमति लिएका छन् ।

यसमध्ये नेपाल वायुसेवा निगमले एउटा उडान आज बुधबार साँझ गर्दै छ भने अर्को भोली बिहीबारको लागि तय भएको छ । बाँकी चार्टर अनुमति लिएका विदेशी वायुसेवाले उडान गरिसकेको प्राधिकरणका प्रवक्ता राजकुमार क्षेत्रीले जानकारी दिए ।

उनका अनुसार सामान्य अवस्थामा प्राधिकरण आफैले चार्टर र उद्दार उडानको अनुमति दिने गरेको भएपनि अहिले बन्दाबन्दीको समयमा भने परराष्ट्र मन्त्रालयमार्फत अनुमति माग्नुपर्छ । त्यसपछि गृह, पर्यटन मन्त्रालय हुँदै प्राधिकरण पुग्नुपर्छ । प्राधिकरणपछि विमानस्थलका विभिन्न निकायलाई जानकारी दिने गराइन्छ ।

गृह मन्त्रालय अन्तर्गत विमानस्थलमा अध्यागमन रहेको छ । सो निकायलाई गृह र प्राधिकरणले दुबै तर्फबाट जानकारी दिनुपर्छ । विमानस्थलमा रहेका सबै निकाय परिचालनको लागि प्राधिकरणले उडानको जानकारी गराउने विमानस्थलका प्रवक्ता देवचन्द्रलाल कर्णले बताए ।

बन्दाबन्दीकै अवधिमा सिधै प्राधिकरणसमक्ष उडान अनुमति माग्ने, आवश्यक सोधपुछ गर्ने क्रम बढिरहेको भएपनि परराष्ट र गृहबाट नै अनुमति लिएर आउनुपर्छ ।
त्यसैले अनुमति माग्न चाहने सबै वायुसेवालाई पहिलो प्रयास नै परराष्ट्रमार्फत गर्न लगाउने गरिएको जानकारी विमानस्थल कार्यालयले दिएको छ ।

नेपालको हवाई क्षेत्रको नियमामक निकाय प्राधिकरण भएकोले सामान्य अवस्थामा आन्तरिक र वाह्य वायुसेवाको लागि सिधै अनुमति दिन सकिने भएपनि अहिलेको परिस्थितिमा भने गृहको अनुमति अनिवार्य लिनुपर्ने हुन्छ ।

प्राधिकरणबाट चार्टर उडान अनुमति लिन स्वदेशी र विदेशी दुबै प्रकारका वायुसेवाले भ्याटबाहेक प्रति उडान ५० डलर तिर्नुपर्ने व्यस्था छ । विदेशी वायुसेवाको हकमा हरेक चार्टर उडानमा अनुमति लिनुपर्छ । तर, आन्तरिक वायुसेवाले भने एक पटक लिएको अनुमति १५ दिनसम्म प्रयोग गर्न पाउने व्यवस्था विमानस्थल सेवाशुल्क नियमावली २०६७ ले गरेको छ ।

चार्टर उडानबाट नै नेपाल वायुसेवा निगमको ए३३० वाइडबडी जहाज आज बुधबार साँझ अस्ट्रेलिया जाने भएको छ । निगमका प्रवक्ता अर्चना खड्काका अनुसार साँझ ५ः३० बजे निगमको एक वाइडबडी जहाज अस्ट्रेलियन दूतावासले बुकिङ गरे अनुसार २६४ जना यात्रु लिएर अस्ट्रेलिया जाँदै छ ।

निगमको जहाज मलेसिया ट्रान्जिट भएर पहिलोपटक अस्टे«लिया जान लागेको हो । २७४ सिट क्षमताको यो जहाज करिब २५ घण्टाको उडानपछि काठमाडौं फर्कन्छ ।
निगको यो जहाज काठमाडौंबाट उडेको चार घण्टामा मलेसियाको क्वालालम्पुर पुग्ने छ । त्यहाँ जहाज अवतरण गरेर आवश्यक इन्धन भर्ने र पुनः अस्ट्रेलियाको ब्रिस्बेन उड्ने छ ।

यस अघि सिड्नी जाने गरी उडान तालिका तय भएपनि सो स्थानमा आफ्ना नागरिकलाई क्वारेन्टिनमा राख्ने व्यवस्था नमिलेपछि अस्ट्रेलियाले ब्रिस्बेन लैजाने गरी उडान गन्तव्य तय गरेको जानकारी पनि निगमकी प्रवक्ता खड्काले दिईन् ।

निगमको अर्को वाइडबडी जहाज भने भोली बिहीबार पुनः स्वास्थ्य सामग्री लिन चीन जाँदै छ । भोली बिहान १०ः३० बजे चीन जाने उक्त जहाज बेलुका ८ः३० बजे फर्कने भएको छ । यो जहाजले चीनबाट करिब २४ हजार किलो स्वस्थ्य सामग्री ल्याउने गरी कार्यतालिका तय भएको पनि निगमले जानकारी दिएको छ ।

प्रतिकृया दिनुहोस