रिपोर्ट मंगलबार, चैत १८, २०७६

सयौं नेपाली सीमामा अलपत्र : संघीय सरकारको निर्णय कार्यान्वयनमा स्थानीय तह अनिच्छुक

मुकेश पोखरेल

सयौं नेपाली सीमामा अलपत्र : संघीय सरकारको निर्णय कार्यान्वयनमा स्थानीय तह अनिच्छुक

बन्दाबन्दीको समयमा नेपाल आउन नपाएर सीमा क्षेत्रमा अलपत्र परेका नेपालीहरूको उद्धार गर्ने सरकारले निर्णय गरेपनि त्यसको कार्यान्वयन नहुँदा सयौं नेपाली सीमा क्षेत्रमा अलपत्र परेका छन् ।

नेपाल भारत सीमा क्षेत्र सुनौलीमा ३ सय र नेपालको पश्चिम नाका दार्चुलामा पाँच सय नेपाली नेपाल प्रवेश गर्न नपाएर सीमामै अलपत्र परेका छन् ।

उनीहरू ३ दिनदेखि सीमा क्षेत्रमा बसेका छन् । आइतबार प्रधानमन्त्री केपी शर्मा ओलीको अध्यक्षतामा बालुवाटारमा बसेको मन्त्रीपरिषद बैठकले सीमा क्षेत्रमा अलपत्र परेका नेपालीहरूलाई नेपाल ल्याउने निर्णय गरेको थियो ।

त्यसैगरी सोमबार बसेको प्रदेश नम्वर ५ को मन्त्रीपरिषद बैठकले पनि सीमामा अलपत्र परेका नेपालीको समूह बनाई सम्बन्धित जिल्लामा पठाउने र उनीहरूलाई सम्बन्धित स्थानीय सरकारले क्वारेन्टिनमा राख्ने निर्णय गरेको थियो । नेपाल भारत मैत्री समाजका अध्यक्ष डा.शान्तकुमार शर्माका अनुसार भारतका विभिन्न ठाउँबाट आएका नेपालीहरू सुनौली स्थित् बसपार्कमा ३ दिनदेखि अलपत्र परेका छन् ।

अलपत्र नेपालीहरूलाई सुनौलीका संघ संस्थाहरूले विद्यालय तथा सार्वजनिक ठाउँमा पाल लगाएर राख्ने व्यवस्था गरेका थिए । “हिंजो साँझ नेपाल तर्फबाट गएका कसैले उनीहरूलाई नेपाल फर्कन खुल्ला भयो भनेर सुनाए । त्यसपछि उनीहरू दशगजासम्म आए । सीमाबाट उनीहरूलाई नेपाल छिर्न दिइएन”, शर्मा भन्छन् “उनीहरुलाई भारतीय प्रहरीले फर्केर उता जान पनि दिएन, नेपाल प्रहरीले नेपाल आउन दिएको छैन । रातभर दशगजामा बिताए । अवस्था बिजोग छ ।”

शर्माका अनुसार उनीहरू दिल्लीदेखि दुई दिन हिंडेर आएका थिए । त्यसपछि बसले महंगो पैसा लिएर उनीहरूलाई सुनौलीसम्म ल्याएको थियो ।

सीमा क्षेत्रबाट उनीहरूको उद्दारका लागि भइरहेको पहलका बारेमा रुपन्देहीका प्रमुख जिल्ला अधिकारी महादेव पन्थलाई सम्पर्कका लागि हिमालले पटक पटक प्रयास गरेपनि उनले फोन उठाएनन् ।

सीमा क्षेत्रमा अलपत्र परेका नेपालीको उद्दारका लागि पहल गर्न सम्पर्क गर्न खोजेपनि प्रजिअले टेलिफोन नउठाएको समाजका अध्यक्ष शर्माले बताए । उनका अनुसार सुनौलीमा अलपत्र परेका नेपालीहरूलाई भारत र नेपालको सीमावर्ती क्षेत्रका स्थानीयहरूले खानाको व्यवस्था गरेका छन् ।

त्यसैगरी पश्चिम नेपालको दार्चुला जिल्लासंग सीमाना जोडिएको भारतको धार्चुलामा पाँच सयभन्दा बढी नेपालीहरू पनि नेपाल प्रवेश गर्न नपाएपछि सीमा क्षेत्रमा अलपत्र परेका छन् ।

दार्चुलाका पत्रकार शंकर धामीका अनुसार सोमबार दिनभर नेपाल प्रवेशको माग गर्दै सीमा क्षेत्रमा नाराबाजी गरेका उनीहरूलाई स्थानीय प्रशासनले नेपाल प्रवेश गर्न रोक लगाएको थियो ।

त्यसपछि भारततर्फ फर्केका उनीहरूलाई धार्चुलाको स्थानीय प्रशासनले विद्यालय र धर्मशालामा खान र बस्नको व्यवस्था गरेको छ ।

केही भने महाकाली नदीमा पौडेर नेपाल आएका थिए तर उनीहरूलाई प्रहरीले नियन्त्रणमा लिएको थियो ।

दार्चुलाका प्रमुख जिल्ला अधिकारी यदुनाथ पौडेलले यसभन्दा अघि पनि दुई पटकसम्म सीमामा अलपत्र परेका नेपालीहरूको दु:ख देखेर प्रवेश दिइएको बताए । पत्रकार धामीका अनुसार भारतबाट आएकाहरूले गाउँमा गएर क्वारेन्टिनमा बस्नुपर्ने नियम पालना नगरेका कारण पनि दार्चुलाका स्थानीय तहहरू भारतबाट प्रवेश गर्नेहरूलाई रोक लगाउन स्थानीय प्रशासनलाई दबाव दिएका छन् ।

जसले गर्दा संघिय सरकारले गरेको निर्णय पनि स्थानीय तहमा कार्यान्वयन भएको छैन ।

“एक पटकलाई भनेर प्रवेश दियो, त्यसपछि फेरि अर्कोपटक हुल बाँधेर जर्वजस्ती गर्दछन्,” धामी भन्छन् “गाउँमा गएर पनि क्वारेन्टिनमा बस्नुको साटो गाउँभर डुल्ने र हामीलाई के भएको छ भनेर उल्टै स्थानीय जनप्रतिनिधिलाई थर्काएपछि उनीहरूलाई सीमामै रोकिएको हो ।”

 

प्रतिकृया दिनुहोस