समाचार विहीबार, चैत १३, २०७६

मिस वर्ल्डकी मोर्लीलाई कोरोना संक्रमणको आशंका, आखिर कसले किन ढाँटिरहेको छ ?

हिमालखबर

मिस वर्ल्डकी मोर्लीलाई कोरोना संक्रमणको आशंका, आखिर कसले किन ढाँटिरहेको छ ?
बायाँबाट क्रमशः सुरज वैद्य, रितु वैद्य, मोर्ली, टोनी सिंह, अनुष्का श्रेष्ठ र श्रृंखला खतिवडा। तस्वीरः सुरज वैद्यको ट्वीटर ह्याण्डलबाट

आज १२ चैत मिस इण्डियाको अफिसियल ट्विटर ह्याण्डलबाट ‘फेमिना मिस इण्डिया २०१९’ सुमन रावले मिस वर्ल्ड अर्गनाइजेसनकी अध्यक्ष जुलिया मोर्लीको शीघ्र स्वास्थ्यसुधार कामना गरिएको ट्विट आयो ।

मोर्ली र मिस वल्र्डको आधिकारिक ट्विटर ह्याण्डललाई समेत मेन्सन गरिएको ट्विटमा मोर्लीलाई हालसालै कोभिड–१९ निदान भएको भनी उल्लेख गरिएको छ । यसले मोर्लीमा कोरोना भाइरसको संक्रमण भएको यसअघिको आशंकालाई बल दिएको छ ।

यसअघि लेखिका तथा विभिन्न सौन्दर्य प्रतियोगिताकी निर्णायक रहिसकेकी स्याली एन फसेटले पनि आफ्नो ट्वीटर ह्याण्डलबाट मोर्लीलाई दुई साताअघि कोरोना भाइरसको संक्रमण भएको बारेमा २१ मार्चमा जानकारी दिएकी थिइन् । भारतीय सञ्चारमाध्यम टाइम्स अफ इण्डियाले पनि मोर्लीलाई कोरोना भाइरस संक्रमण भएको भन्ने भिडियो स्टोरी आफ्नो वेबसाइटमा सार्वजनिक गरेको छ ।

‘नेपाल भ्रमण वर्ष २०२०’ को प्रवद्र्धनका लागि २२–२३ फागुनमा काठमाडौं आएकी मोर्लीमा कोभीड–१९ पोजेटिभ देखिएको भन्ने समाचार हिमालखबरले प्रकाशित गरेको थियो । यद्यपि समाचारमा ‘२२ फागुन (५ मार्च) मा नेपाल आएर भोलिपल्ट फर्केकी मोर्ली यहाँ बसाईको क्रममा, ट्रान्जिटमा या गन्तव्य पुगिसकेपछि कोरोनाभाइरसबाट संक्रमित भएको भन्ने नखुलेको जनाइएको थियो ।

तर, यस्तो समाचार प्रकाशित भएलगत्तै मोर्लीको नेपाल आगमनसँग जोडिएका संस्था तथा व्यक्तिहरुले उनलाई संक्रमण भएको भन्ने समाचार असत्य रहेको दाबी गर्दै आएका छन् ।

मिस नेपालको आयोजक द हिडन ट्रेजरले गत १० चैतमा आफ्नो आधिकारिक फेसबुक पेजमार्फत ‘मोर्लीलाई कोरोना भाइरसको संक्रमण नभएको’ भन्ने सन्देश मिस वल्र्डबाट प्राप्त भएको भन्दैं सार्वजनिक गरेको थियो ।

भ्रमण वर्षका संयोजक सुरज वैद्य स्वयंले पनि ट्वीटमार्फत आफ्नी श्रीमती रितुले मोर्लीसँग कुराकानी गरेको र उनले आफूमा उक्त फ्लुका संक्रमण नभएको बताएको भन्दैं मोर्लीकै भनिएको सन्देश पोष्ट गरेका थिए ।

द हिडन ट्रेजर र वैद्यले मोर्लीमा कोरोनाभाइरस संक्रमण नभएको भनी उद्धृत गरे पनि मोर्ली स्वयं वा मिस वल्र्डले भने आधिकारिक र सार्वजनिक रुपमा यसबारे केही बोलेको छैन ।

भ्रमण वर्ष संयोजक वैद्यले मोर्लीमा संक्रमण नदेखिएको तर स्याली एन फसेटको सूचना बाझिएपछि स्यालीलाई संक्रमण र स्रोतबारे प्रष्ट पार्न ट्वीटमार्फत नेपालबाट समेत आग्रह गरिएको थियो ।

जवाफमा स्यालीले अर्को ट्वीट गर्दै मोर्लीका अत्यन्त नजिकका मित्रलाई आफूलाई यसबारे बताएको भन्दैं आफ्नो सूचना आधिकारिक भएको दाबी गरेकी थिइन् ।

आखिर के हो तथ्य ? कसले लुकाइरहेको छ घातक सूचना ?

यता सुरज वैद्य भने मिस वल्र्डको आयोजकले आफूहरुलाई मोर्लीलाई कोरोना संक्रमण नभएको भनी औपचारिक रुपमा जवाफ दिएकाले पत्याएको बताउँछन । “मिस वल्र्डको आयोजकले झुटो बोल्छ भनेर कसरी अनुमान गर्ने ?” वैद्य भन्छन्, “त्यत्रो संस्थाले भनिसकेपछि विश्वास त गर्नुप¥यो नि !”

वैद्य विश्वव्यापी महामारी देख्दादेख्दै यसलाई आफूहरुले यसलाई ढाकछोप नगरेको र हलुका रुपमा नलिएको तर्क गर्छन् ।
वैद्यकै तर्कमा सहमत हुँदै पूर्व मिस नेपाल श्रृङ्खला खतिवडाले पनि मोर्लीमा संक्रमण नभएको भन्दैं आफ्ना सामाजिक सञ्जालहरुमा पटकपटक पोष्ट गरेकी छन् ।

मिस वल्र्ड २०१९ टोनी एन सिंह तथा मिस वल्र्ड अर्गनाइजेशनका निर्देशक एवं छोरा स्टिभ डग्लससँगै नेपाल आएकी मोर्ली नेपालमा रहँदा नक्सालस्थित होटल मेरियटमा बसेकी थिइन् । उनको सम्मानमा पर्यटन मन्त्री योगेश भट्टराईको उपस्थितिमा रात्रिभोज आयोजना गरिएको थियो ।

मोर्लीले मिस नेपाल अनुष्का श्रेष्ठ, पूर्व मिस नेपाल श्रृङ्खला खतिवडा, द हिडन टे«जरका अधिकारी तथा केही पत्रकारहरुसँगै सिन्धुपाल्चोकको हेलम्बु र मकवानपुरको कैलाश गाउँपालिकाको चेपाङ बस्तीको भ्रमण गरेकी थिइन् ।

तर, मोर्लीको शंकास्पद स्वास्थ्य अवस्थालाई ख्याल राख्दैं उनीसँग भेटेका कसैले पनि स्वास्थ्य जाँच गराएको कुरा अहिलेसम्म खुल्न आएको छैन ।

प्रतिकृया दिनुहोस