समाचार मंगलबार, फागुन ६, २०७६

ट्रेड युनियन खारेज गरे आन्दोलन गर्ने चेतावनी

हिमालखबर

ट्रेड युनियन खारेज गरे आन्दोलन गर्ने चेतावनी

नेपाल निजामती कर्मचारी संगठनले ट्रेड युनियन खारेज गरे आन्दोलनमा जाने चेतावनी दिएको छ । भक्तपुरमा २ र ३ फागुनमा बसेको सातौं केन्द्रीय समिति बैठकका निर्णयहरु सार्वजनिक गर्दै संगठन उक्त धारणा सार्वजनिक गरेको हो ।

नेपाल निजामती कर्मचारी संगठनका अध्यक्ष केदारप्रसाद देवकोटाले मंगलबार ट्रेड युनियन खारेज गर्ने, संकुचित गर्ने र अधिकार खुम्च्याउने सरकारको तरिका आफूलाई स्वीकार्य नहुने भन्दै आन्दोलन गर्ने चेतावनी दिए ।

उनले संघीय निजामती कर्मचारी सेवा ऐन निर्माणको क्रममा संसदको राज्य व्यवस्था तथा सुशासन समितिमा केही सांसदहरुले ट्रेड युनियन खारेज गर्नुपर्ने तथा अधिकार खुम्च्याउने बहस चलाएको भन्दै आपत्ति जनाए । संगठनले ट्रेड युनियन खारेज गर्नेगरी ऐन ल्याइए आन्दोलन गर्ने भनेर वरिष्ठ उपाध्यक्ष लेखनाथ कोइरालाको संयोजकत्वमा ‘आन्दोलन तयारी तथा परिचालन समिति’ गठन गरिसकेको जानकारी उनले दिए ।

कर्मचारी संगठनले कर्मचारीको मात्रै हितमा नभइ सिंगो राष्ट्रिय हितका लागि समेत आवाज उठाउने गरेको भन्दै उ नले ट्रेड युनियनमा लाग्ने कर्मचारीहरुमाथि कार्यालयको काम नगरी ट्रेड युनियनको मात्र काम गर्ने आरोप लाइएको आरोपको खण्डन समेत गरे ।

प्रतिकृया दिनुहोस