समाचार शुक्रबार, फागुन २, २०७६

कुवेतमा मृत्यु भएका नेपालीको विषयमा यथार्थ सार्वजनिक गर्न सरकारलाई आयोगको पत्र

हिमालखबर

कुवेतमा मृत्यु भएका नेपालीको विषयमा यथार्थ सार्वजनिक गर्न सरकारलाई आयोगको पत्र

राष्ट्रिय मानवअधिकार आयोगले कुवेतमा घाइते र मृत्यु भएका नेपालीको यथार्थ विवरण सार्वजनिक गर्न सरकारसँग आग्रह गरेको छ । कुवेतको एउटा कम्पनीमा कार्यरत छ नेपाली कामदार कामको सिलसिलामा ढिस्कोले पुरिएर मृत्यु भएपछि आयोगले व्यक्तिको सांस्कृतिक अधिकारको व्यवस्था गर्न र घाइतेलाई निःशुल्क उपचारको व्यवस्था मिलाउन सरकारसँग आग्रह गरेको हो ।

गत माघ २९ गते ढिस्कोले पुरिएर मृत्यु भएका तथा घाइते भएकाको प्रभावकारीरूपमा निःशुल्क उपचार गर्न, आवश्यक राहत क्षतिपूर्ति उपलब्ध गराउन तथा निजहरुको सांस्कृतिक अधिकारसमेतको संरक्षण हुने गरी आवश्यक व्यवस्था मिलाउनसमेत आयोगले आग्रह गरेको हो ।

आयोगका सचिव वेदप्रसाद भट्टराईले शुक्रबार जारी गरेको प्रेस विज्ञप्तिमा "आयोगले घटनाका सम्बन्धमा यथार्थ जानकारी गराउन प्रधानमन्त्री तथा मन्त्रिपरिषद्को कार्यालय, परराष्ट्र मन्त्रालय र श्रम, रोजगार तथा सामाजिक सुरक्षा मन्त्रालयलाई पत्राचारसमेत गरेको" जनाइएको छ ।

वैदेशिक रोजगारीमा गएका कामदारको सुरक्षा तथा उनीहरुको मानवअधिकारको सुनिश्चितताका लागि दीर्घकालीन कार्ययोजना तथा नीति बनाई आवश्यक सुरक्षा व्यवस्था मिलाउन समेत आयोगले सरकारलाई आग्रह गरेको छ ।

 

प्रतिकृया दिनुहोस