खेलकुद मंगलबार, माघ २१, २०७६

अभ्यास खेलमा ‘नेपाल ए’ सँग अमेरिका पराजित

हिमालखबर

अभ्यास खेलमा ‘नेपाल ए’ सँग अमेरिका पराजित

विश्वकप क्रिकेट लिग–२ खेल्न आएको अमेरिका मूलपानीमा मंगलबार भएको अभ्यास खेलमा ‘नेपाल ए’ टिमसँग ३७ रनले हारेको छ । नेपालबाट विश्वकप क्रिकेट लिग–२ खेल्ने शरद भेषवाकरले मात्र खेलेका थिए ।

११२ रनको सामान्य लक्ष्य पछ्याएको अमेरिका ३३.२ ओभरमा ७४ रनमा समेटियो । नेपालका लागि स्पिनर सागर ढकालले चार र शेर मल्लले तीन विकेट लिए ।

यसअघि पहिला ब्याटिङ गरेको नेपालका लागि सुवास खकुरेलले अविजित ५२ रन बनाए । उनले ८९ बल खेलेका थिए ।

खकुरेललाई अन्य कुनै पनि ब्याट्स्म्यानले साथ दिएनन् । अर्का ओपनर सुनिल धमला ७ रनमा बाहिरिए भने भेषवाकरले ५ रन मात्र बनाए । त्यसपछि आएका पवन सर्राफले १२ रन बनाएका थिए ।

नेपाली टिममा सन्दीप जोरा, भुवन कार्की, किशोर महतो, लोकेश बम र आकाश चन्द पनि समावेश थिए । नेपाली टोलीको कप्तान खकुरेलले गरेका थिए ।

नेपाल र अमेरिकाबीचको पहिलो खेल शनिबार हुनेछ । बुधबार नेपालले ओमानविरुद्ध खेल्दै विश्वकप क्रिकेट लिग–२ को सुरुवात गर्नेछ ।

प्रतिकृया दिनुहोस