समाचार मंगलबार, माघ १४, २०७६

एक महीनादेखि नाग्म–गमगढी सडक अवरुद्ध, सडक खुलाउन अझै एक साता लाग्ने

हिमालखबर

एक महीनादेखि नाग्म–गमगढी सडक अवरुद्ध, सडक खुलाउन अझै एक साता लाग्ने
एक महीनादेखि अवरुद्ध नाग्म–गमगडी सडक खण्डको बुलबुले झाडनाउला खण्डमा जमेको हिउँ पन्छाउँदै सडक डिभिजन कार्यालय जुम्लाको स्काभेटर । तस्वीरः सौजन्य सडक डिभिजन कार्यालय जुम्ला

हिमाली जिल्ला मुगु जोड्ने नाग्म –गमगढी सडक खण्ड एक महीनादेखि बन्द भएको छ । गत १७ पुसमा कर्णालीमा दोस्रो पटक परेको बाक्लो हिमपातले नाग्म–गमगढी सडक अवरुद्ध भएको हो ।

बाक्लो हिमपातले नाग्म–गमगढी सडक खण्डको भुलबुले–घुच्ची, सात मोड–झाड नाउलामा करीब ४ फिट हिउँ जमेपछि नाग्म–गमगढी सडक एक महीनादेखि बन्द भएको सडक डिभिजन कार्यालय जुम्लाले जनाएको छ ।

पहिलो पटक गत २८ मंसीरमा परेको हिमपातले पनि नाग्म–गमगढी सडक बन्द भएको र बन्द सडक एक सातापछि डोजर लगाई खुलाइएको भएपनि पुनः परेको हिउँले सडक बन्द भएको सडक डिभिजन कार्यालय जुम्लाका प्रमुख लिलाबहादुर भण्डारीले जानकारी गराए ।

उनका अनुसार एक महीनादेखि हिमपातले बन्द सडक खुलाउने प्रयासमा सडक डिभिजनले काम जारी राखेको छ । ५ दिनदेखि हिउँ पन्छाउन डोजर प्रयोग गरेका छौं, बाक्लो हिमपातले जमिन नछोडेपछि हिउँ पन्छाउन समस्या भएको छ । मौसममा सुधार आएमा र यस्तै कामको गतिमा डोजरले हिउँ पन्छाउँदै गएमा नाग्म–गमगढी सडक एक साता भित्र संचालनमा आउने प्रमुख भण्डारीले बताए ।

नाग्म–गमगढी सडक खण्डमा हिउँदमा हिमपातले र वर्षामा पानीले अवरुद्ध हुने गरेको छ । १ पुस, २०६९ मा मुगु सडक सञ्जालमा जोडिएको भएपनि हालसम्म सडकको स्तरोन्नति नहुँदा यो सडकखण्डमा वर्षको ४ महीना मात्र सवारी साधन चल्ने गरेका छन् ।

सडक खुलेको लामो समय भइसक्दा पनि सडकका न्यूनतम मापदण्ड ग्राभेल, पानीका नाला, ढल, कल्भड, व्यवस्थित नहुँदा हिउँदमा हिउँ र वर्षामा पानीले सडक बन्द हुने गरेको उद्योग वाणिज्य संघ मुगुका उपाध्यक्ष रत्नसिंह मल्ल बताउँछन् ।

वर्षको ८ महीनासम्म सडक बन्द हुँदा व्यापारीलाई व्यवसाय गर्नपनि समस्या हुने गरेको छ । उपभोक्ताले खोजेको सामान उपलब्ध गराउन व्यापारीलाई मुस्किल हुने गरेको छ । सडकको नाममा राजनीतिक खिचातानीले व्यापारी, सर्वसाधारण मर्कामा परेका छन् ।

सडक बन्द हुँदा स्थानीय तहका विकास निर्माणका काम पनि प्रभावित भएका छन् । स्थानीय तहका पुल, पुलेसा बत्तीका सामान ढुवानीमा समस्या भएको र काम पनि अधुरै रहेका स्थानीय तहले बताएका छन् ।

त्यस्तै मुगु जिल्लाको खत्याड गाउँपालिका जोड्ने गोठीजिउला–कालाकाँडा–गम्था सडकखण्ड पनि अवरुद्ध भएको दुई महीना पुगिसक्दा पनि सरोकारवाला निकायहरू मौन रहँदा यो गाउँपालिकाका स्थानीय बजारहरू रातापानी, माझचौर, राउतडी, सेरी र पाँचेबजारमा दैनिक उपभोग्य तथा निर्माण सामग्रीहरूको अभाव बढ्दै गएको छ ।

यो खण्डमा बाख्लो हिउँ जमेर सडक अवरुद्ध भई यातायातका साधनहरू चल्न नसक्दा स्थानीय व्यापारी तथा सर्वसाधारणहरूले सास्ती भोग्दै आएका छन् ।

स्थानीय व्यापारी लोकराज दाहाल सडक अवरुद्ध भएको लामो समय हुँदा पनि सडक डिभिजन तथा गाउँपालिकाले सडक खुलाउन कुनै प्रयास नगर्दा आफूहरू मर्कामा परेको बताउँछन् ।

यो गाउँपालिकामा पनि जिल्लाका अन्य स्थानीय तहहरूझैं विकास निर्माणका काम शुरु हुन सकेका छैनन् । निर्माण सामग्रीहरू स्थानीय बजारमा उपलब्ध नहुँदा विकास निर्माणका कामहरू अवरुद्ध भएका हुन् ।

अच्युत राज भण्डारी, मुगु

प्रतिकृया दिनुहोस