समाचार मंगलबार, माघ १४, २०७६

प्रबल घिमिरेकाे मृत्यु शंकास्पद जनाउँदै अनुसन्धान गर्न पत्राचार

कमल रिमाल

प्रबल घिमिरेकाे मृत्यु शंकास्पद जनाउँदै अनुसन्धान गर्न पत्राचार
मृतक घिमिरे र प्रमुख जिल्ला अधिकरीलाई पत्र बुझाउँदै वडाध्यक्ष पोखरेल । तस्वीर: कमल रिमाल

विराटनगरमा लेखा परीक्षकको काम गर्दै आएका प्रबल घिमिरे (५२) को शंकास्पद मृत्युका विषयमा छानविन नभएको जनाउँदै वडा कार्यालयले जिल्ला प्रशासन कार्यालयलाई पत्राचार गरेको छ ।

गत ७ माघमा विराटनगर–२ का घिमिरेको शव स्थानीय सिंघिया खोलामा डुबेको अवस्थामा फेला परेको थियो । वडा कार्यालयले हालसम्म मृत्युको सत्यतथ्य पत्ता लाग्न नसकेको जनाउँदै आइतबार जिल्ला प्रशासन कार्यालय मोरङमा पत्र बुझाएको छ ।

वडाध्यक्ष कुमार पोखरेलले प्रमुख जिल्ला अधिकारीलाई पत्र बुझाउँदै अनुसन्धान गरी घटनाको वास्तविकता सार्वजनिक गर्न आग्रह गरे ।

घटनाका विषयमा अनुसन्धान भइरहेको र ६ माघ राति घिमिरेको सम्पर्कमा रहेका ५ जना व्यवसायीसहित सातजना निगरानीमा रहेको प्रहरीले बताएको छ ।

मृतक घिमिरे

जिल्ला प्रहरी कार्यालय मोरङका नायब उपरीक्षक लोकदर्शन थापाका अनुसार व्यवसायीहरू नन्दकिशोर राठी, अरुण राठी, अनिलकुमार चाण्डक, विनय कर्ण, विजयराज प्रसाई तथा चालकद्वय पशुपति खड्का र चन्द्रबहादुर दर्जीको बयान लिइएको छ ।

उनीहरूको मोबाइल फोनको कल डिटेल मगाइएको छ भने मृतक घिमिरेको हराएको मोबाइलको सिमकार्ड अरुमा प्रयोग भए नभएको पत्ता लगाउन आइएमई नम्बर पनि खोजी गरिएको थापाले बताए ।

६ माघ राति घिमिरेलाई चन्दकिशोर राठीले फोन गरेर बोलाएका थिए । राठीकै उद्योगमा मोटरसाइकल राखेर उनीहरू होटलमा गएका थिए ।

होटल मुनमा खानपिनपछि चाण्डकको गाडीमा चालक दर्जीले घिमिरेलाई घर नजिकै ल्याएर छाडेको हालसम्मको अनुसन्धानबाट खुलेको छ ।

होटल संचालक प्रसाई र सोही होटलमा घिमिरे र राठीसँग भेट भएका सुनचाँदी व्यवसायी अरुण राठीलाई पनि बोलाएर बयान लिइएको प्रहरीले बताएको छ ।

पोष्टमार्टम रिपोर्ट आएपछि भिसेरा जांच गरिने र त्यसपछि मात्रै हत्या भए नभएको खुल्ने थापाले जानकारी दिए ।

 

प्रतिकृया दिनुहोस