समाचार सोमबार, माघ १३, २०७६

मिडिया काउन्सिल विधेयक विधायन समितिले पारित गर्दै

हिमालखबर

मिडिया काउन्सिल विधेयक विधायन समितिले पारित गर्दै
null

राष्ट्रियसभाको विधायन व्यवस्थापन समितिले सोमबार मिडिया काउन्सिल विधेयक पारित गर्दैछ ।

यसअघि भएका छलफल र सुझावका आधारमा सोमबार बिहान बसेको बैठकमा सहमति भएर टुंगिएकाले आजै पारित हुन लागेको समितिका सदस्यहरुले बताए ।

विधेयकमा रहेको जरिवाना, क्षतिपूर्ति तथा सजायका व्यवस्था हटाउने तथा यसअघि आएका सुझाव अनुसार अन्य व्यवस्था पनि संशोधन गरेर पारित गर्न लागिएको समिति सदस्य उदया शर्माले जानकारी दिइन् । विधेयकमा ‘ऐन तत्काल लागु’ हुनेछ भनिएकोमा संशोधन गरेर ३१ दिनपछि लागू हुने भन्ने प्रावधान राखिएको उनको भनाइ छ ।

समितिका अर्का सदस्य प्रकाश पन्थले समितिले बनाएको प्रतिवेदन अध्ययनका लागि दिउँसो आफूहरुले केहीबेर समय मागेको र साढे ३ बजेको बैठकले संभवत पारित गर्ने बताए ।

विधेयकमा आमसञ्चार माध्यम, पत्रकार र प्रकाशकलाई २५ हजारदेखि १० लाख रुपैयाँसम्म जरिवाना गर्न सक्ने व्यवस्था राखिएकोमा नेपाल पत्रकार महासंघलगायत सञ्चार क्षेत्रले विरोध गरेको थियो ।

नेपाल पत्रकार महासंघका अध्यक्ष गोविन्द आचार्यले महासंघले उठाएका विषय कसरी सम्बोधन गरियो भन्ने पछिल्लो जानकारी नआएको बताए । उनले भने, “संशोधनसहित समितिले पारित गर्न लागेको जानकारी भने एक सांसद दिएका थिए, तर कसरी आउँदैछ भन्ने विस्तृत भने थाहा छैन ।”

प्रतिकृया दिनुहोस