थप समाचार बुधबार, माघ ८, २०७६

अस्ट्रेलियामा फेरि दन्कियो आगो, राजधानी सहितका कयौं स्थान खाली गराइयो

हिमालखबर

अस्ट्रेलियामा फेरि दन्कियो आगो, राजधानी सहितका कयौं स्थान खाली गराइयो

अस्ट्रलियाको राजधानी केनबराको एअरपोर्टको नजिकै रहेको जंगलमा आगो सल्किएपछि शहरका केही स्थान खाली गराइएको छ ।

शहर नजिकै लागेको आगोका कारण आवागमन रोकिएको छ । अधिकारीहरूले आगलागी भएका नजिकका क्षेत्रलाई खाली गर्न र प्रभावित क्षेत्रभन्दा टाढै रहन भनेका छन् ।

अस्ट्रेलियामा केही दिन अघि परेको पानी र तापमानमा आउको गिरावटका कारण आगलागी नियन्त्रणमा केही सफलता मिलेको थियो । तर, तीव्र हावा र फेरि तापमान बढ्नाले बुधबार फेरि स्थिति नियन्त्रण बाहिर गएको समाचार संस्था रोयटर्सले जनाएको छ ।

सामाजिक संजालमा राखिएका तस्वीरमा राजधानीका उपनगरीय क्षेत्रमाथि धुवाँको मुस्लो फैलिएको देखिएको छ । हालैका दिनमा केनबरा, सिड्नी र मेलबर्न विश्वमा सबभन्दा प्रदूषित शहरमध्येका भएका छन्।
गत सेप्टेम्बरदेखि शुरु भएको आगलागीबाट अहिलेसम्म २९ जनाको मृत्यु भइसकेको छ । २५ सय घर पूर्णरुपमा नष्ट भएका छन् ।

अस्ट्रेलियाका जंगलहरूमा लागेको आगोको असर बुधबार प्रकाशित आर्थिक सर्वेक्षणमा देखाइएको छ । सर्वेक्षणमा खर्च कटौतीको विषय ल्याइएको छ ।

प्राकृतिक विपत्तिबाट विश्वकै १४ औं ठूलो अर्थ व्यवस्थामा दबाब परेको देखिएको छ । सर्वेमा डिसेम्बरदेखि मार्चसम्मको तीन महीनामा घरेलु उत्पादनमा ०.२५ अंकको कमी आउनसक्ने आकलन गरिएको छ ।

 

प्रतिकृया दिनुहोस