अन्तर्वार्ता/विचार विहीबार, पुस २४, २०७६

"प्रदेश–१ मा पत्रु खाना निषेध गर्छौं", जीवन घिमिरे, सामाजिक विकास मन्त्री

हिमालखबर

"प्रदेश–१ मा पत्रु खाना निषेध गर्छौं", जीवन घिमिरे, सामाजिक विकास मन्त्री
प्रदेश–१ का सामाजिक विकास मन्त्री जीवन घिमिरे ।

९ पुसमा ‘स्वस्थ जीवन प्रवर्द्धन कार्यक्रम’ शुरू गरेको प्रदेश–१ का सामाजिक विकास मन्त्री जीवन घिमिरे भन्छन्, “निषेध गरिने पत्रु खानाको सूची बनाउँदैछौं।”

प्रदेश–१ को ‘स्वस्थ जीवन प्रवर्द्धन’ कस्तो कार्यक्रम हो ?

अहिले सरकारको नीति, कार्यक्रम तथा बजेट धेरै अस्पताल बनाउन र डाक्टर उत्पादन गर्न केन्द्रित छ । तर, ‘स्वस्थ जीवन प्रवर्द्धन कार्यक्रम’ उपचार गर्नुभन्दा रोग लाग्नै नदिने जागरण अभियान हो । पत्रु खाना नदिन र नियमित र अनिवार्य स्वास्थ्य जाँच गराउन जागरण थालेका छौं ।

संघीय स्वास्थ्य मन्त्रीबाट उद्घाटन भएकै दिन प्रदेशका सबै स्थानीय तहका प्रमुख/उपप्रमुख, प्रदेश सांसद, सबै जिल्लाको प्रतिनिधित्व हुने गरी प्रधानाध्यापक तथा शिक्षा क्षेत्रका व्यक्तित्व, स्वास्थ्यकर्मी र सरोकारवाला गरी ५०० भन्दा बढीले हस्ताक्षर गरेर अभियानमा प्रतिबद्धता जनाएका छन् ।

पत्रु खानाको निर्धारण कसरी गर्नुभएको छ ?

विज्ञ सहितको निर्देशक समितिको १६ पुसमा मेरै अध्यक्षतामा बसेको बैठकले पत्रु खानाको सूची तयार गर्न ‘विज्ञ समूह’ बनाएको छ । उक्त समूहले बनाएको सूचीका आधारमा ती खानेकुरा निषेध गर्नेछौं । उक्त सूची चाँडै सार्वजनिक गर्नेछौं । कतिपय पालिका र विद्यालयले पत्रु खाना निषेधित गर्न थालिसकेको जानकारी आएको छ ।

अभियानको अनुगमन कसरी हुन्छ ?

त्यसका लागि प्रदेशस्तरको समिति बनिसक्यो, अब जिल्लास्तरको बन्छ । माघभरिमा १३७ वटै पालिका र त्यसपछि सबै वडामा अनुगमन संयन्त्र बनाउने योजना छ ।

प्रदेशका रोगी र निरोगी नागरिकको तथ्याड्ढ सरकारसँग छ ?

एकपटकका लागि प्रदेशभर अनिवार्य सबैले स्वास्थ्य जाँच गराउने र त्यसपछि क्यान्सर, मधुमेह र रक्तचापको नियमित जाँच गराउने व्यवस्था गर्दैछौं । प्रत्येक जिल्लामा क्यान्सरको जाँच गर्न सक्ने गरी उपकरण र हरेक स्वास्थ्य केन्द्रमा २० वर्ष उमेर पुगेकाले रक्तचाप र मधुमेहको परीक्षण गर्नैपर्ने कानूनी व्यवस्था गर्दैछौं ।

यस्तो कानून कार्यान्वयन होला त ?

अब बन्ने मात्र होइन सूर्तीजन्य पदार्थ नियन्त्रण सम्बन्धी संघीय कानून कार्यान्वयनमा पनि कडाइ गर्छौं । निरोगी बन्ने र रोग लाग्नु अघि स्वास्थ्य जाँच नियमित गराउने जागरण अभियानका लागि निर्देशिका जारी भइसक्यो ।

 

प्रतिकृया दिनुहोस