कला/साहित्य शनिबार, पुस १२, २०७६

दिक्पालको ‘आदिवासी विद्रोहको इतिहास’ लोकार्पण

हिमालखबर

दिक्पालको ‘आदिवासी विद्रोहको इतिहास’ लोकार्पण
तस्वीरः डम्बरकृष्ण श्रेष्ठ

पत्रकार, लेखक राजकुमार दिक्पालको पुस्तक ‘आदिवासी विद्रोहको इतिहास’ शनिबार लोकार्पण भएको छ ।

नेपाल प्रज्ञा प्रतिष्ठानका पूर्व कुलपति तिलविक्रम नेम्वाङ (बैरागी काइँला), लेखककी आमा चन्द्रमाया मुदेनछोङ साँवालगायत उपस्थित अतिथिहरूले पुस्तकको सामूहिक लोकार्पण गरेका थिए ।

कार्यक्रमका प्रमुख अतिथि बैरागी काइँलाले हरेक आदिवासीका लागि यो पुस्तक प्रकाशनले उदाहरणीय काम भएको बताए । हरेक आदिवासीका आआफ्नै इतिहास भएको र यसको खोजी ढिलो भइसकेको बताउँदै उनले भने, “विद्रोहका मात्र होइन, अन्य संस्कार, संस्कृतिका कुरा पनि इतिहास हुन्छ, व्यक्तिको पनि इतिहास हुन्छ, अब त्यतातिर ध्यान पुग्नुपर्छ ।”

पुस्तकबारे टिप्पणी गर्दै डा.कृष्ण भट्टचनले नेपालमा आदिवासी विद्रोहका इतिहास खोतल्ने प्रयास गरेर लेखकले सम्पूर्ण आदिवासी समुदायमा गुन लगाएको बताए । “अब इतिहासकारहरू आदिवासी समुदायको कथ्य इतिहास लेखनतर्फ ध्यान दिनुपर्ने देखिन्छ”, उनले भने ।

समारोहमा प्राज्ञ इतिहासकार दिनेशराज पन्त, डा. चैतन्य सुब्बा, मञ्जरी प्रकाशनका अध्यक्ष लक्ष्मण गाम्नागे लगायत वक्ताले पुस्तकको प्रशंसा गर्दै यो कर्म आदिवासी विद्रोह इतिहासबारे लेखनको शुरुवात भएको र पूरा गर्ने काम सबैको भएकोमा जोड दिएका थिए ।

नेपाल वाङ्मय परिषद् र मञ्जरी प्रकाशनद्वारा आयोजित समारोहमा लेखक दिक्पालले आदिवासी विद्रोहको गर्विलो इतिहासलाई केलाउने आफ्नो सानो प्रयत्नले आदिवासी समुदाय र भावी पुस्तालाई समेत प्रेरित गर्न सके सार्थक ठान्ने बताए । “परिवारवृत्तिका लागि परदेशमा रहेका बेला लेखिएको पाण्डुलिपिमा धेरै अनुसन्धानकर्मी, सहयोगी, शुभेच्छुक र परिवारजनको अमूल्य सहयोग छ, सबैलाई धन्यवाद दिन चाहन्छु”, उनले भने ।

प्रतिकृया दिनुहोस