समाचार शनिबार, पुस १२, २०७६

उखुको बक्यौता रकम माग गर्दै सर्लाहीका किसानकाे माइतीघर मण्डलामा धर्ना

रासस

उखुको बक्यौता रकम माग गर्दै सर्लाहीका किसानकाे माइतीघर मण्डलामा धर्ना
तस्वीर: रासस

उखुको बक्यौता रकम नपाएको भन्दै सर्लाहीका किसान शनिबारबाट काठमाडौंको माइतीघर मण्डलामा धर्ना बसेका छन् ।

सर्लाहीको अन्नपूर्ण र महालक्ष्मी सुगर मिलले किसानलाई बक्यौता रकम भुक्तानी दिन आलटाल गरेका कारण उनीहरू धर्नामा बस्न बाध्य भएको बताएका छन् ।

यसअघि गत ६ जेठमा सर्लाही जिल्लाका प्रमुख जिल्ला अधिकारी द्रोणप्रसाद पोखरेल, राष्ट्रिय जनता पार्टी (राजपा) का सहमहामन्त्री राकेश मिश्र, ‘उखु किसान सङ्घर्ष समिति’ अध्यक्ष रामेश्वारथ राय र सचिव हरिश्याम रायको समस्या समाधान समितिले २०७६ साल भदौ मसान्त भित्रमा किसानको बक्यौता रकम भुक्तानी दिने निर्णय गरेको थियो ।

सङ्घर्ष समितिका पदाधिकारीले पुस मसान्तसम्म पनि बक्यौता रकम भुक्तानीको व्यवस्था नगरेमा सर्लाहीका दुवै चिनी मिल्स बन्द गर्ने चेतावनी दिएका छन् ।

सर्लाही जिल्लामा झन्डै ३० हजार बिघा क्षेत्रफलमा उखु खेती गरिन्छ । उखु खेतीमा करीब २० हजार किसान आबद्ध रहेको ‘उखु किसान सङ्घर्ष समिति’ अध्यक्ष रायले बताए ।

सर्लाही जिल्लाका २० हजार किसानको अन्नपूर्णसँग रु ५० करोड र महालक्ष्मीसँग रु २१ करोड गरी कूल ७१ करोड बक्यौता रहेको समितिका सचिव हरिश्याम रायले बताए।

सरकारले सालाखाला उखुको मूल्य प्रतिकेजी रु ५।३६ पैसा तोकेको भए पनि ऊखु मिल्सले किसानलाई रु ४।३५ पैसा मात्र भुक्तानी दिँदै आएका छन् । किसानको अन्नपूर्णसँग २०७० र महालक्ष्मीसँग २०७५ सालदेखिको रकम बक्यौता रहेको बताइन्छ ।

प्रतिकृया दिनुहोस