रावाबेँसी गाउँपालिका प्रमुखको गाडीमा आगजनी
खाेटाङकाे रावाबेँसी गाउँपालिका प्रमुख लिलानाथ निरौलाको वडा नम्बर ५ दुवेकोलस्थित निवासमा रहेको बा २ झ ३५२४ नम्बरको सवारी साधनमा गए राति आगलागी भएको छ ।
आगलागीका कारण सवारी जलेर ध्वस्तसमेत भएको छ । “सुतिरहेको थिएँ, बम पड्किएको जस्तो ठूलो आवाज आयो” प्रमुख निरौलाले भने, “उठेर हेर्दा गाडीमा ठूलो आगोको मुस्लो दन्किरहेको थियो ।”
करिब दुई घण्टापछि हरमटारबाट गएको प्रहरी टोलीले आगो नियन्त्रणमा लिएको थियो ।
प्रमुख जिल्ला अधिकारी विष्णुहरि उपाध्यायले खोटाङका प्रमुख प्रहरी नायब उपरीक्षक वामदेव गौतम नेतृत्वको टोली घटनास्थलमा खटाइएको र आवश्यक अनुसन्धान शुरु गरिएको जानकारी दिए ।