समाचार आइतबार, मंसिर २२, २०७६

सोमबार नेकपाको सचिवालय बस्दै, केन्द्रीय कमिटी बैठक बोलाउनेबारे छलफल

हिमालखबर

सोमबार नेकपाको सचिवालय बस्दै, केन्द्रीय कमिटी बैठक बोलाउनेबारे छलफल

सत्तारुढ नेपाल कम्युनिष्ट पार्टी (नेकपा) को सचिवालय बैठक सोमबार बस्ने तयारी भएको छ ।

तल्लो कमिटीलाई उपनिर्वाचन परिणामको समीक्षा प्रतिवेदन मागेको नेकपाले सचिवालय बैठकमा पराजयको कारणबारे छलफल गर्ने प्रवक्ता नारायणकाजी श्रेष्ठले बताएका छन् ।

सचिवालय बैठककाे तयारीका लागि अध्यक्ष पुष्पकमल दाहालले खुमलटारमा आइतबार बिहान केही नेताहरुसँग छलफल गरेका छन् । बरिष्ठ नेता माधवकुमार नेपाल, महासचिव विष्णुप्रसाद पाैडेल, सचिवालय सदस्य ईश्वर पाेखरेल, स्कूल विभाग उपप्रमुख देवेन्द्र पाैडेल सँग दाहालले छलफल गरेका हुन् । 

१४ मंसीरको उपनिर्वाचनमा धरान र भक्तपुर गुमाए पछि १८ मंसिरमा सचिवालय बैठक बसेको थियो । त्यही बैठकले तल्लो कमिटीबाट उपनिर्वाचनको समीक्षा आएपछि सोमबार छलफल गर्ने तयारी गरेको हो ।

सोमबारको सचिवालय बैठकले स्थायी कमिटी र केन्द्रीय कमिटी बैठक बोलाउनेबारे समेत छलफल गर्ने भएको छ । ३ जेठ २०७५ मा पार्टी एकीकरण भए पनि नेकपाको केन्द्रीय सदस्यहरुको बैठक एक पटक पनि बस्न सकेको छैन ।

 

प्रतिकृया दिनुहोस