दुई घण्टापछि अन्तर्राष्ट्रिय उडान सञ्चालन
त्रिभुवन अन्तर्राष्ट्रिय विमानस्थलमा दुई घण्टा अवरुद्ध बनेको अन्तर्राष्ट्रिय उडान सञ्चालनमा आएको छ।
विमानस्थलका महाप्रबन्धक प्रेमनाथ ठाकुरका अनुसार, अहिले ‘म्यानुअल्ली’ रूपमा अन्तर्राष्ट्रिय उडान भइरहेको छ। “अहिले म्यानुअल्ली रूपमा उडान भइरहेको छ”, ठाकुरले भने, “सबै सरकारी सर्भर डाउन भएकाले समस्या आएको अध्यागमन कार्यालयले जानकारी दिएको छ।”
अहिले जहाज उडान तथा अवतरणमा कुनै समस्या नभएको उनले बताए। यात्रुको व्यवस्थापनमा केही समस्या भएको र विमानस्थलमा यात्रुको भीड बढेको उनले जानकारी दिए।
अध्यागमनको सर्भर डाउन हुँदा अन्तर्राष्ट्रिय हवाई उडान प्रभावित भएको थियो। केही बेरअघि इन्डिगो एअरको जहाज भारतको नयाँदिल्ली उडेको छ भने फ्लाई दुबईको जहाज भर्खरै अवतरण गरेको छ।
महाप्रबन्धक ठाकुरले विगतमा पनि यस किसिमको समस्या उत्पन्न हुने गरेको भन्दै विमानस्थलको सेवालाई चुस्त र प्रभावकारी बनाउन आइतबार अध्यागमनसँग बैठक बसेर आवश्यक निर्णय लिइने बताए। उनले सबै सरकारी सर्भर डाउन भएकाले आजको समस्या आएको बताए।