एसईई लगायतका परीक्षामा तस्वीर खिच्न रोक

शिक्षा

एसईई लगायतका परीक्षामा तस्वीर खिच्न रोक

हिमालखबर बुधबार, १४ वैशाख, २०७९

सरकारले एसईई लगायत विद्यालय तथा विश्वविद्यालयका परीक्षामा तस्वीर तथा भिडिओ खिच्न रोक लगाएको छ।

बुधबार गृह मन्त्रालयले सूचना जारी गरी विश्वविद्यालय तथा विद्यालयको वार्षिक तथा अन्य परीक्षामा विद्यार्थीको तस्वीर तथा भिडिओ नखिच्न आग्रह गरेको छ। अहिले एसईई परीक्षा चलिरहेको छ।

मन्त्रालयका प्रवक्ता फणिन्द्रमणि पोखरेलद्वारा जारी सूचनामा अनुगमनका नाममा ठूलो सङ्ख्यामा मानिसहरू परीक्षा हलमा प्रवेश गर्ने गरिएको पाइएको र यसले परीक्षाको वातावरण अस्वस्थ बनाएको जनाइएको छ।

गृह मन्त्रालयले भनेको छ, ‘परीक्षामा परीक्षार्थीलाई उत्तरपुस्तिका वितरण गर्नुपूर्व एवं परीक्षा अवधिभर कार्यालय प्रयोजनका लागि बाहेक अन्य कुनै पनि प्रकारले तस्वीर वा भिडिओ नलिन तथा तोकिएका निरीक्षक बाहेक अनुगमनका नाममा ठूलो सङ्ख्यामा बाह्य व्यक्तिहरू एकैपटक वा पटक पटक परीक्षा हलमा प्रवेश गरी परीक्षाको वातावरण अस्वस्थ बनाउने गरेको पाइएकाले त्यस्ता कार्य नगर्न नगराउनुहुन सम्बन्धित सबैमा जानकारी गराइन्छ।’