‘आपराधिक क्रियाकलापहरू स्वीकार नगरेको’ भन्दै माधव नेपालमाथि कारबाही
नेपाल कम्युनिष्ट पार्टी (एमाले) का अध्यक्ष केपी शर्मा ओलीले पार्टीका पूर्वमहासचिव माधवकुमार नेपालले आपराधिक क्रियाकलाप स्वीकार नगरेकाले निलम्बन गरेको उल्लेख गरेका छन्।
नेता नेपाललाई सोमबार पठाइएको पत्रमा लेखिएको छ, “आपराधिक क्रियाकलापहरू स्वीकार्ने, भुलसुधार गर्ने, पार्टी एकता तथा पार्टीको निरन्तर विकास र उन्नतिका लागि पार्टीमा समाहित हुने साथै विगतमा भए गरिएका गलत तथा आपराधिक क्रियाकलापहरूप्रति प्रायश्चित्त गर्ने अवसरलाई त्यसै गम्भीरताका साथ लिनुको साटो तपाईंले उल्टै स्पष्टीकरण सोध्ने जस्तो अनधिकृत र हास्यास्पद कार्य गरेको देखियो।”
निलम्बनको अवधि बीचमै थप कारबाही गर्न सकिने पनि पत्रमा उल्लेख छ। पत्रमा नेता नेपाललाई सच्चिनको लागि यो अन्तिम मौका भनिएको छ।
अध्यक्ष ओलीले अर्का नेता भीम रावललाई समेत पार्टी सदस्यबाट निलम्बन गरेका छन्। रावललाई पनि नेपाललाई लेखिएकै व्यहोराको पत्र पठाइएको छ।
७ चैतमा बसेको एमाले केन्द्रीय कमिटीको बैठकले वरिष्ठ नेता नेपालसहित चार जनासँग स्पष्टीकरण सोध्ने निर्णय गरेको थियो। उनीहरूमध्ये घनश्याम भुसाल र सुरेन्द्र पाण्डेले स्पष्टीकरणको प्रत्युत्तर पठाएका छैनन्।
केपी ओलीले माधवकुमार नेपाललाई पठाएको पत्रः
विषयः निलम्बन गरिएको सम्बन्धमा ।
श्री माधवकुमार नेपाल, सदस्य, दशौं राष्ट्रिय महाधिवेशन आयोजक कमिटी,
नेपाल कम्युनिष्ट पार्टी (एमाले) ।
तपाईं, माधवकुमार नेपाललाई मिति २०७७।१२।०८ मा पार्टीको तर्फबाट स्पष्टीकरण माग गरिएकोमा तपाईंले मिति २०७७।१२।१२ मा पार्टीमा पेश गर्नुभएको स्पष्टीकरणको जवाफमा देहाय बमोजिम देखियोः
१) तपाईंले पार्टी एकतालाई विखण्डन गर्ने, पार्टी फुटाउने, पार्टीभित्रको सहकार्य र सद्भावलाई क्षतविक्षत पार्ने गरी निरन्तर अवैधानिक गुट भेला तथा पार्टीका कुभलो चिताउनेहरूसँग निरन्तर बैठक भेटघाट गर्ने र उनीहरूको पक्षपोषण गर्ने कार्य निरन्तर गरिरहनुभई उक्त कार्यलाई निरन्तरता दिने स्वीकारोक्तिसहित अहंकार र आत्मकेन्द्रित कुराहरू उल्लेख गरी स्पष्टीकरणको जवाफ दिएको देखियो।
२) स्पष्टीकरणमा सोधिए अनुसार आफ्नो भुलत्रुटिको स्वीकारोक्ति नगरेको, कुनै आत्मसमीक्षा नगरिएको, आत्मालोचना गर्ने कुनै प्रवृत्ति नदेखिएको, अहंकार, आत्मकेन्द्रित र स्वार्थी प्रवृत्ति प्रष्ट रूपमा देखियो। आफ्नो स्वार्थको लागि देश जनता र पार्टीको हितलाई जस्तोसुकै क्षति पुर्याउन तयार भएको आपराधिक मनोवृत्ति प्रष्ट रूपमा थप पुष्ट भएको।
३) आपराधिक क्रियाकलापहरू स्वीकार्ने, भुलसुधार गर्ने, पार्टी एकता तथा पार्टीको निरन्तर विकास र उन्नतिको लागि पार्टीमा समाहित हुने साथै विगतमा भए गरिएका गलत तथा आपराधिक क्रियाकलापहरूप्रति प्रायश्चित्त गर्ने अवसरलाई त्यसै गम्भीरताका साथ लिनुको साटो तपाईंले उल्टै स्पष्टीकरण सोध्ने जस्तो अनधिकृत र हास्यास्पद कार्य गरेको देखियो।
४) तपाईंले अहिले पनि पार्टीविरोधी फाटोवादी र गुटगत क्रियाकलापहरू नेकपा एमालेकै नाममा गरिरहेको र त्यसलाई आगामी दिनहरूमा समेत निरन्तरता दिइरहनेतर्फ अग्रसरता देखिएको, पार्टीकै लागि एकताकै लागि भन्दै भ्रम फिँजाएर कार्यकर्ता फसाउने र आफ्ना गलत उद्देश्य तथा मनसायका निम्ति दुरुपयोग गर्ने सम्भावना देखिएको।
५) यस्तै गतिविधिहरू कायम रहेमा तपाईंलाई जुनसुकै बेला पनि थप कडा कारबाही गर्नुपर्ने अवस्था आउन सक्नेतर्फ सचेत गराउँदै, यस्ता पार्टीविरोधी गतिविधि बन्द गर्न र सही बाटोमा फर्किने मौका दिन एकै पटक कडा कारबाही गर्नुभन्दा हाललाई पार्टीको दशौं महाधिवेशन आयोजक कमिटी सदस्य र पार्टीका अन्य सबै जिम्मेवारीहरू तथा पार्टी सदस्यताबाटै पार्टीको विधान २०४९ (संशोधन २०७१ समेत) को धारा ४९ (ख) बमोजिम हाललाई ६ (छ) महीनाको लागि निलम्बन गरिएको छ।
तपाईंलाई सच्चिनको लागि यो अन्तिम मौका हो। आफ्ना विचार र क्रियाकलापहरू सच्याई पार्टीका पक्षमा आएमा पार्टीले निलम्बन अवधिको बीचैमा पनि निलम्बनको अवधि घटाउने निर्णय गर्न सकिने र यस सच्चिन दिइएको मौकालाई पार्टीको कमजोरी ठानी पार्टी विरोधी गतिविधिहरू कायमै राखेमा निलम्बनको अवधि बीचमै थप कारबाही गर्न सकिने व्यहोरासमेत जानकारी गराइन्छ।