नेपाली परिकारका सौखिनहरूलाई आफ्नो भान्सामा प्रवेश गराउन सफल भएकी छन् ज्योति पाठक, ' टेस्ट अफ् नेपाल ' लेखेर। उनको यो किताबले १३ वर्षदेखि प्रदान गरिँदै आएको अन्तर्राष्ट्रिय गोर्म्याण्ड वर्ल्ड कुकबुक अवार्ड हात पारेको छ। खाना र रक्सीबारे लेखिएका किताबहरूलाई दिइने यो ढस्कार सरहको सम्मान हो। ३० चैत २०६४ मा लण्डनस्थित ढलम्पिया थिएटरमा ज्योतिलाई कुकबुक अन्तर्राष्ट्रिय पुरस्कारबाट सम्मानित गरिएको थियो। यसैवर्ष उनले वेस्ट फरेन क्विशन बुक अवार्ड पनि पाएकी छन्। न्युयोर्कका पुस्तक पसलहरूमा नेपाली खानाबारे लेखिएका पुस्तकहरू नपाइएपछि नेपाली कुकबुक लेख्ने निधो गरेकी थिइन् उनले।

तीनसय ५० नेपाली खानाको बारेमा लेखिएको उनको किताबमा शाकाहारी र मांसाहारी दुवै परिकार बनाउने तरिकाहरू वर्णन गरिएका छन्। गुन्द्रुक र मस्यौराको रस, लप्सीको अचार, योमरी, दम आलु, सिस्नुको तरकारी, रामेछापको बन्दा•गोभी तरकारी, सेलरोटी, कालो दाल र जिम्बु, तामा, गुन्द्रुक, मृगको मासुको भुटुवा, तारेको माछा, दही हालेको बोका•खसीको मासु जस्ता मुखै रसाउने नेपाली परिकार बनाउने तरिका पुस्तकमा बताइएको छ।

भारतको बरोडास्थित एम्एस् विश्वविद्यालयबाट गृह•विज्ञानमा डिग्री गरेकी ज्योति चार दशकअघि अमेरिका गएकी हुन्। न्युयोर्कमा रहेर चिकित्सक पति र छोराछोरीका लागि नेपाली खाना तयार पार्ने उनी आज अन्तर्राष्ट्रिय पुरस्कार विजेता बनेकी छन्। किताब लेख्ने क्रममा उनले नेपालमा रहेका आफ्ना परिवारका सदस्यबाट पनि सहयोग लिइन्। भान्साभित्र कहिले यो वा कहिले त्यो पकाउने ज्योतिले किताब लेख्दाको समयको स्मरण गर्दै भनिन्, “किचनबाट बाहिर निस्केर धेरै कुराको अध्ययन गर्नु पर्‍यो।”