बोल्न र सुन्न नसक्ने (बहिरा) को कथा अब चलचित्रको पर्दामा देखिने भएको छ। भर्खरै निर्माण सकिएको चलचित्र तिमीमात्र तिमी मा नायिका झ्रना थापा बहिरा युवतीको भूमिकामा देखिँदैछन्। बहिरा केटीको प्रेम कथामा आधारित यस चलचित्रकी प्रमुख पात्र झ्रनाले चलचित्रभरि नै एक शब्द संवाद बोलेकी छैनन्। बोल्नका लागि साङ्केतिक भाषाको प्रयोग गरिएको यो चलचित्रमा अभिनय गर्न उनले बहिराहरूको साङ्केतिक भाषाको प्रशिक्षण समेत लिएकी थिइन्। एनआर फिल्मस् प्रालिको व्यानरमा निरज ढकाल र रिमेश अधिकारीले निर्माण गरेको चलचित्रमा झ्रना थापा, राज बल्लव कोइराला, नन्दिता केसी, मुकेश आचार्य, प्रज्ञा जोशी, लक्ष्मी अधिकारीलगायतका कलाकरको अभिनय रहेको छ। नव सङ्गीतकार ताराप्रकाश लिम्बूको सङ्गीत, समन अधिकारीको नृत्य निर्देशन, कुमार महर्जनको द्वन्द्व निर्देशन तथा दीपेन्द्र घिमिरे निर्माण नियन्त्रक रहेको चलचित्रको निर्देशन योगेश घिमिरेले गरेका छन्। निर्देशक घिमिरे हाल बनिरहेका चलचित्र भन्दा यसलाई फरक भन्न रुचाउँछन्। उनले भने प्रमुख पात्र नै बोल्न नसक्ने चलचित्र भएकाले यसमा नौलो प्रयोग गरेका छौँ। हाम्रै समाजको वास्तविक कथा भएकाले दर्शकको मन जित्ने कुरामा विश्वस्त छु।