पूर्वी पहाडमा सक्रिय किराँत जनवादी वर्कर्स पार्टी नामक सशस्त्र समूहले विद्रोहको नाममा उदयपुरमा जबर्जस्ती चन्दा आतङ्क मच्चाएपछि गाविस सचिवहरू गाउँ नजाने भएका छन्। उक्त समूहले २ जेठमा जिल्लाका सबै ४४ वटै गाविसलाई रु.२ लाखका दरले चन्दा दिनुपर्ने पत्र लेखेको भोलिपल्टै बसेको गाविस सचिव हक-हित संरक्षण केन्द्र, उदयपुरको बैठकले चन्दा आतङ्क नरोकिएसम्म गाउँ नजाने निर्णय गरेको छ।

मा'वादी पोलिटब्यूरो सदस्य तथा निवर्तमान संस्कृति तथा राज्य पुनर्संरचना मन्त्री गोपाल किराँतीद्वारा १२ वर्षअघि स्थापित यो समूहका जिल्ला इञ्चार्ज सन्देशले जातीय मुक्ति जनविद्रोहका लागि भन्दै गाविस सचिवको नाममा १० दिने अल्टिमेटम सहित पठाएको पत्रमा चन्दा नदिनेहरूलाई राष्ट्रिय मुक्तिविरोधी कित्तामा राखी कारबाही गर्ने धम्की दिने उल्लेख छ (हे.पत्र)। पत्र जिल्ला विकास समितिको कार्यालयमा छाडिएको छ।

फोन सम्पर्कमा आएका किराँत जनवादीका इञ्चार्ज ज्वालाले पार्टी सञ्चालन र मुक्ति आन्दोलनका लागि मागिएको चन्दा अनिवार्य रहेको बताउँदै भने, “यद्यपि गाविसको अवस्था अनुसार रकममा सहमति भने गर्न सकिन्छ।” उता पार्टीका सगरमाथा इञ्चार्ज हिमाल खम्बुको भनाइमा स्थानीय सत्ताकब्जा गर्दै केन्द्रीय राज्यसत्तामा सबै जातिको समानुपातिक सहभागिताका लागि दबाबस्वरुप चन्दा मागिएको हो। पेशागत महासंघ, नागरिक समाजलगायतले संयुक्त विज्ञप्ति निकाली चन्दा आतङ्कको विरोध गरेका छन्। केन्द्रका केन्द्रीय कोषाध्यक्ष गिरिजाप्रसाद रिजाल चन्दापत्र आएपछि सुरक्षामा चिन्ता बढेको बताउँछन्। जाँते गाविस सचिव राजेन्द्र पराजुली त्रासमा गाउँ जान नसकिने बताउँछन्। जिविसका स्थानीय विकास अधिकारी अर्जुनकुमार थापाले प्रशासन, सुरक्षा निकाय र राजनीतिक दलसँग बसेर छलफल गरी निकास निकाल्नुपर्ने बताए।

यसैबीच किराँत जनवादी वर्कर्सले १९ वैशाखमा त्रियुगा नगरपालिका-२ स्थित हात्तीमाराका दानीप्रसाद चौधरी, बैकुण्ठनाथ दाहाल र 'मभक्त मैनालीको क्रमशः साढे ६, ३ र १८ कठ्ठा जग्गामा झ्ण्डा गाडेर कब्जा जमाएका छन्। वर्कर्सले आफ्नो सल्लाह बेगर किनबेच गर्न नपाउने चेतावनी दिएको छ।