निजामतीमा पनि खोज्ने कि?
हिमाल (१६-३१ वैशाख) मा प्रकाशित नक्कली परीक्षार्थीसम्बन्धी घरमै डिग्री हिमाल खोज ज्यादै सान्दर्भिक छ। हिमाल ले यस्तो खोज निजामती सेवातर्फको बढुवामा हुने अनियमितताको विषयमा पनि गर्नु जरुरी छ। मूल्याङ्कनमा हुने गरेको भेदभाव लगायतमा सम्बन्धित उच्च पदस्थहरूको संलग्नता खोज्ने कि?

रामचन्द्र घिमिरे, काठमाडौं

भर्त्सनायोग्य कार्य
हिमाल (१-१५वैशाख) को उकालो लाग्दा दोहोर्‍याई-तेहर्‍याई पढेँ। प्रधानमन्त्री पुष्पकमल दाहालको प्रेसजगतप्रतिको धारणामा लेखकको प्रस्तुति पढ्दा आँखा रसाएर आयो। अहिले पत्रकारिताजगत मात्रै हैन आम सचेत नागरिक समाज नै मौन छ। एकीकृत मा'वादीका ठूला तिघ्रा र चर्का स्वरबाट जनता चेतनाविहीन जस्तै भएका छन्। स्थानीय एफएम स्टेशनमा कार्यरत सञ्चारकर्मीहरूको सातो उडेको छ। खरो बहस गर्न सक्ने इन्द्र लोहनी अभाव खट्किएको छ, मा'वादीले गरेको गलत क्रियाकलापको विरोध गर्ने सञ्चारमाध्यमको कमी महसूस भएको छ। आफ्नै व्यवहारका कारण अलोकप्रिय हुँदै गएको मा'वादीको गलत क्रियाकलापको बारेमा सञ्चारमाध्यमले निर्धक्क भएर लेख्न र बोल्न सक्नुपर्दछ।

कल्पलता श्रेष्ठ
सरस्वती उमावि
खानीभन्ज्याङ, 'खलढुङ्गा

हिमाल (१-१५ वैशाख) को प्रेसमाथि जाई नलाग सम्पादकीय ज्यादै गर्विलो लाग्यो। एकीकृत मा'वादीको हरेक क्षेत्रमा एकछत्र मा'वादीकरण गर्ने चाहनाप्रति नेपाली जनता घोर विमति राख्छन् भन्ने उसले बुझनुपर्दछ। यदि मा'वादीहरू म नै राज्य हुँ भन्ने अहम् राख्छन् भने तिनको अन्त्य पनि सुखद् हुँदैन। अध्यक्ष पुष्पकमल दाहालको २५ चैतको भाषणबाट प्रेसजगतलाई मा'वादीले सबभन्दा ठूलो शत्रु ठान्दोरहेछ भन्ने प्रस्ट हुन्छ।

सिद्धार्थ गौतम
सिर्जनानगर, भक्तपुर-१७

अभिभावक संघ किन मौन
सरकारले लगाएको शिक्षा करबाट सरकार र विद्यालय सञ्चालक मोटाउने र अभिभावक दुब्लाउने भएका छन्। अर्थमन्त्रीको जोर चलेन हिमाल (१-१५ वैशाख)मा शिक्षा कर कानूनबाटै हटाउने सहमति भएको भनेर उल्लेख गरिएको छ। यसको अर्थ विद्यार्थीको बिलमा पाँच प्रतिशत शिक्षा विकास सहयोग शुल्क चढाउने भन्ने हो। आफूलाई पाँच प्रतिशत शिक्षा कर लगाउँदा सडक तताउने निजी विद्यालय सञ्चालकहरूले अभिभावकको ढाड सेक्ने गरी अप्रक्रियागत रूपमा ३० देखि ३५ प्रतिशत शुल्क वृद्धि गरेका छन्। यस्तो अवस्थामा पनि विद्यार्थीको नाममा राजनीति गर्ने विद्यार्थी सङ्गठन र अभिभावक संघहरू किन मौनता साँधेर बसेका होलान्?

भरत क्षेत्री,
बुटवल

३९ कि ५९?
हिमाल (१-१५ वैशाख) मा छापिएको लाखौंमा ३० रत्न धेरै राम्रो लाग्यो। सबैका जीवनी प्रेरणादायी छन्। कल्याण श्रेष्ठको उमेर ३९ वर्ष उल्लेख छ। करिब ३० वर्ष न्याय क्षेत्रमै बिताएका श्रेष्ठको उमेर ५९ हुनुपर्ने होइन र!

कमला राजभण्डारी
ऐंसेलुखर्क-३, खोटाङ

(असावधानीवश हुन गएको गल्ती औंल्याइदिनुभएकोमा धन्यवाद-सं.)