चौखठीमा गर्दै आशा मगराती र रञ्जु झा।

पूर्वी तराईको मधेशी समुदायमा घरको चौघेरामा सीमित महिलाको कथामा छोटो फिल्म चौखठी निर्माण गर्दा दीपक रौनियारले संसारको सबैभन्दा ठूलो फिल्म महोत्सव फेस्िटभल दि क्यान्स्को बारेमा सोचेकै थिएनन्। २६-३० मङ्सिरमा राजधानीमा सम्पन्न विश्वका १८ देशका ६६ फिल्म सहभागी काठमाडौं अन्तर्राष्ट्रिय पर्वतीय चलचित्र महोत्सव २००८ (किम्फ)मा विदेशी फिल्मसँगको प्रतिस्पर्धामा अब्बल सावित भएलगत्तै दीपकको थ्रेसहोल्ड (चौखठी) क्यान्स्मा सहभागी हुनेभएको छ। पेरिसमा रहेकी शोभा चन्दको सहयोगमा फिल्म दर्ता
गराएको बताउँदै दीपकले भने “क्यान्स्मा मेरो फिल्म संयोग र केही साथीभाइको सहयोगले पुगेको हो।”

निर्देशक दीपक रौनियारयात्रामा

निर्देशक रौनियारका अनुसार ३० वैशाखदेखि ८ जेठसम्म फ्रान्समा हुने महोत्सवको ३५ मिनेटभन्दा छोटा फिल्म सर्टफिल्म कर्नर भन्ने शोकेस मा देखाइनेछ। यसका साथै, क्यानडा सरकारले गर्ने स्पेशल क्यान्स २००९ नामक छोटा चलचित्र प्रतिस्पर्धामा भने यो प्रतियोगीका रूपमा मात्र सहभागी हुनेछ। छोटा फिल्महरूको मूल प्रतिस्पर्धामा सहभागी हुन १५ मिनेटभन्दा छोटो फिल्म हुनुपर्नेमा चौखठी ३० मिनेटको भएकोले त्यसमा आवेदन नदिएको उनले बताए।

पत्रकारिताबाट चलचित्रतिर लागेका रौनियार किम्फको सफलतापछि क्यान्सको सहभागिताले निकै उत्साहित छन्। क्यान्सअघि केदार शर्माको निर्देशनमा बन्ने एक वृत्तचित्रका लागि मलेशिया जान लागेका दीपक फ्रान्स यात्रापछि नयाँ फिल्मको योजना बनाउँदैछन्।