देहव्यापार रोक्न टोलवासी सक्रिय
दाङको तुलसीपुर नगरपालिकाको नयाँसडक टोल देहव्यापारबाट प्रभावित हुन थालेपछि त्यसलाई रोक्न टोलवासी सक्रिय भएका छन् ।
देहव्यापारले टोल बद्नाम हुँदा तुलसीपुर क्षेत्रकै प्रतिष्ठामा आँच पुर्याउने हुनाले नियन्त्रण अभियान थालिएको नयाँसडक टोल विकास संस्थाका सचिव भीमबहादुर केसीले बताए । केसीले भने, “अन्यत्र जाँदा नकारात्मक टिप्पणी सुनिन थालेपछि विकृति रोक्न समिति नै गठन गरेर लागेका हौं ।”
समितिले सुधारको पहिलो चरणमा शंकास्पदहरूलाई अन्यत्र जान र होटल संचालकहरुलाई केटीहरू नराख्न आग्रह गरेको छ । तुलसीपुर क्षेत्रमा खास गरेर होटेल र लजका कारण यौन व्यवसाय बढेको इलाका प्रहरी कार्यालयका प्रमुख मदन थापा बताउँछन् । यो क्षेत्रका होटेलमा तीन-तीन दिनमा छापा मार्ने गरेको पनि थापाले बताए । “त्यस क्रममा समातिएका किशोरीहरूलाई अभिभावक खोजेर बुझाउने गरेका छौं” थापा भन्छन् ।
देविका घर्ती मगर, दाङ
