अश्लील फिल्मको होड, के हेर्दैछ सेन्सर बोर्ड ?
फिल्म चलाउनका लागि यौन उत्तेजक दृष्य र संवाद तथा तुक न बेतुक कथामा बनेको ‘द लास्ट किस’ को आलोचना भइरहेका बेला अहिले ‘एटीएम’ नामको अर्को चलचित्र अश्लीलताको पराकाष्टाले सबैको ध्यान खिचेको छ । इन्टरनेटमा राखिएका यसका प्रोमोमा यतिसम्म निकृष्ट र अश्लील यौन दृष्य छन् कि जसले ‘ब्लु फिल्म’को झल्को दिन्छ । तर यसबारे चलचित्र सेन्सरवोर्ड भने मौन छ । सेन्सर वोर्डका अध्यक्ष सुशील ओझासँग जिज्ञासा राख्दा आफू कार्यालय बाहिर रहेकाले केही जानकारी नभएको बताए।
‘एटीएम’ चलचित्रको दृष्य
मनोरञ्जनको साधनमात्र नभएर आमसञ्चारको सशक्त माध्यम पनि मानिन्छ फिल्मलाई । समाज परिवर्तनमा यसले निकै महत्वपूर्ण भुमिका खेल्छ । तर अहिले बनिरहेका केही चलचित्रले समाजमा अराजकता, विकृति फैलाउने यौनजन्य दृश्यहरू पस्किरहेका छन् । यसैका उदारहण हुन् द लास्ट किस र एटीम । चलचित्र निर्माता संघका अध्यक्ष राजकुमार राई समाजमा अराजकता बढाउने खालको चलचत्रि बनाउन कसैलाई छुट नभएको र यस्ता कामप्रति आफ्नो आपत्ति रहेको बताउँछन् ।
अहिले यस्ता चलचित्रमाथि प्रतिबन्ध लगाउन चलचित्र विकास वोर्ड र सेन्सर वोर्डलाई चौतर्फी दवाब आइरहेको छ । केही दिन अघि केही निर्देशकले यस्तो चलचित्र माथि कार्वाही गर्न विकास वोर्डमा ज्ञापन पत्र बुझाएका थिए । वोर्डका प्रवक्ता विकास आचार्यले कार्वाही गर्ने अधिकार बोर्डलाई नभएकोले सेन्सर वोर्डलाई पत्रमार्फत अनुरोध गरेको बताए । ‘सी ग्रेड’का हिन्दी चलचित्र भन्दा पनि अश्लील यी चलचित्रका दृष्य हेर्दा निर्माताहरु फिल्ममार्फत यौन बेच्न बसेको महसुस सबैले गर्न थालेका छन् ।
यी मात्र हैन ‘प्ले गर्ल’, ‘बिन्दास’, ‘रिङरोड’, ‘फुलस्टप’ जस्ता निर्माणाधीन चलचित्र पनि सेक्समै केन्द्रित रहेर निर्माण भइरहेको बताइन्छ ।
‘लुट’मा राखिएको छाडा संवाद तथा ‘चपली हाइट’को यौनजन्य दृष्यका कारणले चलचित्र चलेका भन्दै अहिले यौनजन्य दृष्य राखेर फिल्म बनाउनेको होड नै चलेको छ । यस्तो होड नरोकिए नेपाली फिल्मको भविष्य कता जाने हो भनेर सोच्ने बेला आएको छ ।
